Deputy Commissioner Quetta Mehrullah Badini ka tarqiyati mansoobon aur jadeed IT lab par jaiza ijlas, kaam tez karne ki hidayat

Quetta: Deputy Commissioner Quetta Mehrullah Badini ki zer-e-sadarat shehr mein jari tarqiyati mansoobon aur jadeed IT lab ke qayam o pesh raft se mutalliq ijlas hua, jis mein mansoobon ki maujooda soorat-e-haal, miyar-e-tameer aur muqarrara muddat mein takmeel samet mukhtalif umoor ka tafseeli jaiza liya gaya.

Ijlas mein Assistant Commissioner (City) Quetta Amir Hamza aur XEN (City) samet mutalliqa afsaran shareek hue. XEN (City) ne Deputy Commissioner ko mansoobon ki pesh raft, jari tameeraati kaam, darpesh masail aur takmeel ke liye kiye jane wale iqdamat par tafseeli briefing di.

Ijlas mein shehri sahuliyat ki behtari, infrastructure ki tarqi, tameeraati kaam ki raftar o miyar aur awami mufad ke mansoobon ki barwaqt takmeel par tabadla-e-khayal hua. Deputy Commissioner ne hidayat ki ke mansoobon ki baqaida nigrani ki jaye taake ghair zaroori takheer na ho aur ahdaf barwaqt hasil kiye ja saken.

Jadeed IT lab par ghaur karte hue Deputy Commissioner ne kaha ke maujooda daur mein information Technology aur jadeed digital sahuliyat ki ahmiyat se inkar mumkin nahin, is liye lab ko jadeed taqazon se hum ahang banane ke liye tamam zaroori iqdamat kiye jayen.

Mehrullah Badini ne wazeh kiya ke tarqiyati mansoobe awami falah aur shehri sahuliyat ki behtari ke liye intehai ahem hain, is liye miyar par koi samjhauta bardasht nahin kiya jayega. Unhon ne kaam ki raftar tez karne, musalsal monitoring aur muqarrara miyar ke mutabiq takmeel ki hidayat ki, aur kaha ke tamam mahkame bahmi rabte se rukawaten fauri door karen aur pesh raft ki baqaida report pesh karen.

Tasveer: Bashukriya DGPR Balochistan