Deputy Commissioner Quetta Mehrullah Badini ka Balochistan University mein zer-e-tameer E-Commerce o IT Lab ka daura

Quetta: Deputy Commissioner Quetta Mehrullah Badini ne Balochistan University mein zer-e-tameer jadeed E-Commerce o Information Technology (IT) Lab ka daura kiya aur mansoobe par jari tameeraati o takmeeli kaam ka tafseeli jaiza liya. Is moqe par unhon ne Lab ki tameer, dastiyab sahuliyat aur mansoobe ki pesh raft ka muayena kiya.

Jadeed E-Commerce o IT Lab ki tameer ka kaam aakhri marahil mein daakhil ho chuka hai, jis ki takmeel se talba ko jadeed digital Technology aur amali tarbiyat ke behtar mawaqe maissar aane ki tawaqqo hai.

Daure ke dauran Deputy Commissioner ne Lab ki tameer o takmeel ke mukhtalif umoor ka jaiza lete hue mansoobe par hone wali pesh raft ka mushahida kiya. Unhon ne is amr par tawajjo di ke mansoobe ke tehat faraham ki jane wali sahuliyat miyari hon aur tameeraati kaam ko muqarrara miyar ke mutabiq mukammal kiya jaye. Mansoobe ki barwaqt takmeel aur miyar ko yaqeeni banane ke liye jari kaam ki nigrani ko bhi aham qarar diya gaya.

Jadeed E-Commerce o IT Lab ka qiyam talba ko daur-e-hazir ke taqazon se hum-ahang karne aur unhein Information Technology, digital tijarat aur jadeed karobari tareeqon se roshnas karane ki janib ek aham pesh raft hai. Is Lab ke zariye talba ko apni taleemi malumat ko amali maharaton mein tabdeel karne, digital platforms ko samajhne aur E-Commerce ke shobe mein jadeed tareeqa kaar se aagahi hasil karne ke behtar mawaqe faraham kiye ja sakenge.

Mehrullah Badini ne kaha ke mansoobe ki takmeel ke baad Lab ko taleemi o amali sargarmiyon ke liye istemal mein lane se talba ko jadeed Technology aur E-Commerce ke shobe mein apni salahiyatein nikharne ke mawaqe maissar aane ki tawaqqo hai.

Tasweer: Bashukriya DGPR Balochistan