Deputy Commissioner Naseerabad Virender Lal ki zere sadarat monsoon ijlas, bhari machinery nasheebi ilaqon mein muntaqil karne ki hidayat

Naseerabad: Deputy Commissioner Naseerabad Virender Lal ki zere sadarat monsoon season ke peshgi intezamat ke silsile mein ek aham ijlas munaqid hua, jis mein tamam zilai mahkamon ke sarbarahan ne shirkat ki. Ijlas mein mumkina barishon aur selabi surathal se nimatne ke liye kiye gaye iqdamat par tafseeli briefing di gayi.

Ijlas se khitab karte hue Deputy Commissioner ne hidayat ki ke tamam mutalliqa mahkame hungami surathal se nimatne ke liye hama waqt tayyar rahen. Unhon ne mahkama irrigation aur MMD ko khusoosi taur par hidayat di ke apni bhari machinery aur zaroori aalaat ko fori taur par hassas aur nasheebi ilaqon ke qareeb muntaqil kiya jaye taake kisi bhi hungami surathal mein barwaqt karrawai mumkin ho sake.

Deputy Commissioner ne kaha ke monsoon ke dauran awam ke jaan o maal ka tahaffuz awwaleen tarjeeh hai, is liye tamam idare baahami rabte ko mouassir banayen aur field mein apni mojoodgi yaqeeni banayen.

Unhon ne mutalliqa afsaran ko hidayat di ke nikasi-e-aab ke nizam ko faal rakha jaye aur mumkina rukawaton ko peshgi door kiya jaye taake shehri ilaqon mein pani jama hone se bacha ja sake.

Ijlas mein yeh bhi faisla kiya gaya ke kisi bhi hungami surathal se nimatne ke liye control rooms ko faal rakha jaye ga aur awam ko barwaqt maloomat ki faraahmi yaqeeni banayi jaye gi.

Tasveer: bashukriya DG PR Balochistan