Deputy Commissioner Lasbela Humaira Baloch ka Lyari BHU ka daura, BSDI ke tehat izafi kamron ka iftitah

Lasbela: Deputy Commissioner Lasbela Humaira Baloch ne sub tehsil Lyari mein qaim bunyadi markaz-e-sehat (BHU) ka daura kiya aur markaz ke mukhtalif shobon ka muaina karte hue awam ko faraham ki jane wali tibbi sahuliyat, amle ki hazri aur majmui intizamat ka tafseeli jaiza liya.

Lady Health Visitor ke hathon feeta

Is mauqe par unhon ne Balochistan Special Development Initiative (BSDI) ke tehat tameer kiye gaye bunyadi markaz-e-sehat ke izafi kamron ka baqaida iftitah kiya. Taqreeb ki numaya baat yeh rahi ke Deputy Commissioner Humaira Baloch ne khawateen ki hausla afzai aur sehat ke shobe mein un ke kirdar ko ujagar karne ke liye markaz ki Lady Health Visitor (LHV) ke hathon feeta katwa kar izafi kamron ka iftitah karaya.

Deputy Commissioner Lasbela ne kaha ke BSDI ke tehat tameer kiye gaye izafi kamron se bunyadi markaz-e-sehat ki istedad-e-kar mein numaya izafa hoga, jis se ilaqe ke awam ko behtar, miyari aur broqt tibbi sahuliyat ki faraahmi yaqeeni banai ja sakegi. Unhon ne kaha ke zilai intizamia sehat ke shobe ki behtari, miyari tibbi sahuliyat ki faraahmi aur sehat marakiz ko jadeed khutoot par ustuwar karne ke liye bharpoor iqdamat kar rahi hai.

Baad azan Deputy Commissioner ne BHU aur Rescue 1122 ke amle se mulaqat ki aur un ki karkardagi, khidmat aur darpesh masail par tabadla-e-khayal kiya. District Manager (PPHI) Dr Malik Mansoor ne markaz mein jari tibbi sargarmiyon, amle ki hazri, dastiyab sahuliyat aur darpesh masail par tafseeli briefing di.

Deputy Commissioner Humaira Baloch ne hidayat ki ke hospital aane wale mareezon ke sath khush akhlaqi aur ehtram se pesh aya jaye, adwiyat ki bila tatal faraahmi yaqeeni banai jaye, aur tibbi khidmat ki anjam dehi mein kisi qism ki ghaflat ya laparwahi hargiz bardasht nahin ki jaye gi.

Daure ke dauran maqami umaidin aur ilaqa makinon ne bhi Deputy Commissioner se mulaqat kar ke unhein ilaqe ke masail se agah kiya, jis par unhon ne un ke tarjihi bunyadon par hal ki yaqeen dehani karai.

Is mauqe par Additional Deputy Commissioner Lasbela Siraj Ahmed Baloch, District Health Officer Dr Syed Fareedullah Shah Hashmi, Additional District Health Officer Dr Imran, District Manager (PPHI) Dr Malik Mansoor, District Polio Officer Dr Munir Baloch, SDO B&R Building Abdul Latif, Imran Sattar Khosa aur deegar mutalliqa afsaran bhi mojood the.

Tasveer: Bashukriya DG PR Balochistan