Deputy Commissioner Jafarabad Khalid Khan ka taraqqiyati mansoobon ka daura, miyar par samjhota na karne ki hidayat

Jafarabad: Deputy Commissioner Jafarabad Khalid Khan ne zila mein jari taraqqiyati mansoobon ka daura karke tameerati kamon ka bareek beeni se jaiza liya aur mutaliqa afsaran ko hidayat ki ke miyar par kisi qism ka samjhota na kiya jaye.

Executive Engineer Communication and Works (Buildings) Irfan Ali ne mukhtalif mansoobon ki pesh raft se aagah kiya, jabke Sub Divisional Officer Muhammad Siddique Zehri aur Muhammad Rafiq Abro bhi un ke hamrah the.

Deputy Commissioner ne zer-e-tameer Girls College, tibbi markaz aur Additional Deputy Commissioners ki rehaish gahon ka moayna kiya aur wazeh kiya ke tamam mansoobe aala miyar ke mutabiq muqarra muddat mein mukammal kiye jayen taake awam ko jald az jald sahuliyat muyassar aa sakein.

Unhon ne engineers ko hidayat ki ke tameerati kamon ki khud nigrani karein aur miyar aur raftar par khusoosi tawajjoh dein, kyunke kisi bhi qism ki ghaflat ya takheer hargiz bardasht nahin ki jaye gi.

Tasveer: Bashukriya DGPR Balochistan