DEO Gwadar Zahid Hussain ka Government Girls High School Baghbazar Pasni ka daura

Gwadar: Soobai hukumat ki Taleem dost policy, taleemi miyar mein behtari aur sarkari taleemi idaron mein tadrisi o intizami umoor ki mauassir nigrani ke silsile mein District Education Officer Gwadar Zahid Hussain ne guzishta roz Government Girls High School Baghbazar Pasni ka daura kiya.

Unhon ne mukhtalif class rooms ka muaina kiya aur tadrisi sargarmiyon, talibat ki taleemi karkardagi aur taleemi mahol ka jaiza liya. Unhon ne talibat se taleemi umoor ke hawale se guftagu ki aur unhein miyari Taleem ke husool, mehnat aur baqaidagi se taleemi sargarmiyon mein hissa lene ki targheeb di.

Is moqe par school mein darpesh masail aur taleemi zaruriyat ke bare mein bhi maloomat hasil ki gayin. Unhon ne school ki hal hi mein tameer hone wali nai imarat ka bhi muaina kiya aur tameerati miyar, dastiyab sahuliyat aur taleemi sargarmiyon ke liye imarat ki ifadiyat ka jaiza liya.

Badazan school ki head mistress Balqees Qadir ne DEO Gwadar ko idare ki mojumi taleemi surat-e-haal, tadrisi o intizami umoor, talibat ki zaruriyat aur darpesh masail ke hawale se tafseeli briefing di.

DEO Gwadar Zahid Hussain ne taleemi miyar ko mazeed behtar banane, tadrisi amal ko mauassir banane aur talibat ko sazgar taleemi mahol faraham karne ki ahmiyat par zor dete hue masail ke hal ke liye mumkina iqdamat ki yaqeen dehani karayi.

Tasveer: Bashukriya DGPR Balochistan