Dehi khawateen ka aalami din: Balochistan Board of Investment ka khawateen karobaryon ke liye Business Facilitation Centre aagahi session

Quetta: Chief Minister Balochistan Mir Sarfraz Bugti ki hidayat par dehi khawateen ke aalami din ki munasibat se Balochistan Board of Investment ke zer-e-ehtemam karobari khawateen ke liye Business Facilitation Centre (BFC) se mutaliq aagahi session muniqid hua, jis mein soobe ke door daraz ilaqon se aayi khawateen entrepreneurs ne badi tadad mein shirkat ki.

Board of Investment ke vice chairman Bilal Khan Kakar ne soobe ki khawateen ko khiraj-e-tehseen pesh karte hue kaha ke Chief Minister ka vision hai ke khawateen aur nawjawanon ko karobar aur hunarmandi ki taraf raghib kiya jaye aur unhein har zaroori sahulat di jaye taake woh khud rozgar ke mauqe paida kar ke soobe ki maashi taraqqi mein hissa daal saken.

Business Facilitation Centre kya kare ga

Unhon ne bataya ke BFC ke zariye khawateen ko karobar shuru karne ke liye rehnumai, sahuliyat aur mutaliqa idaron se rabte mein madad faraham ki jayegi taake ibtidai mushkilat kam hon. MD B-Tevta Abdul Kabir Zarkoon ne B-Tevta ki khidmat par roshni dali, jabke CEO Board of Investment Abdul Manan ne idare aur BFC ki khidmat aur karobari sahuliyat se aagah kiya.

Is mauqe par panel discussion bhi hui jis mein secretary taraqqi-e-niswan Sher Shah Ghalzai, manager SMEDA Muhammad Iqbal, Sibi Women University ke shobe Management Sciences ki sarbarah Nazneen Durrani, SIA ke shareek bani Nisar Agha aur Dutch Pakistan ki CEO Didar Mengal shareek huin. Shurka ne khawateen ko karobari mauqe, idara jati moavinat aur hunarmandi se mutaliq maloomat din.

Taqreeb mein khawateen entrepreneurs ne apni masnuaat ke stalls bhi lagaye, jin ke zariye muqami masnuaat aur khawateen ki karobari salahiyyaton ko ujagar kiya gaya.

Tasveer: bashukriya DGPR Balochistan