Commissioner Quetta Shahzeb Kakar ka Corporation ke khokhon ke karaya daaron ko ek hafte mein adaigi schedule dene ka hukum

Quetta: Commissioner Quetta Division Shahzeb Khan Kakar ki zer-e-sadarat Municipal Corporation ke zer-e-intezam dukanon aur khokhon ke karayon, baqayajaat aur deegar mutaaliqa masail ke hal ke hawale se ek ijlas munaqid hua.

Ijlas mein Deputy Commissioner Quetta Mehrullah Badini, Additional Commissioner Quetta Division Agha Samiullah, Assistant Commissioner Revenue Quetta Division Syed Kaleemullah, Anjuman-e-Tajiran ke sadr Raheem Kakar ke alawa Metropolitan Corporation ke afsaran ne shirkat ki.

Ijlas mein Metropolitan Corporation ki amlaak se mutaaliq mukammal record ka jaiza liya gaya. Briefing mein bataya gaya ke Corporation ke zer-e-intezam taqriban 90 khokhe mojood hain, jin mein se 42 khokha malikan ne apne karaye aur wajibaat jama karwana shuru kar diye hain jabke baqi karaya daaron ke zimme 2021 se ab tak ke baqayajaat bhi wajib-ul-ada hain.

Baqayajaat qiston mein, salana 10 feesad izafa barqarar

Ijlas mein faisla kiya gaya ke hukumat ki janib se mutayyan karda karaya har soorat baqaidagi se ada karna hoga. Commissioner Shahzeb Khan Kakar ne kaha ke karaya daaron ki sahulat ke liye baqayajaat ek hi martaba lene ke bajaye qiston mein wasool karne ki gunjaish paida ki ja sakti hai taake woh aasani se apne wajibaat ada kar saken.

Taham unhon ne wazeh kiya ke maujooda muahide ke mutabiq karaye ki adaigi lazmi hai aur muahide ki shiq ke tahat salana 10 feesad karaya izafa bhi nafiz-ul-amal rahega.

Commissioner ne hidayat ki ke tamam dukandar aur khokhe wale ek hafte ke andar aisa qabil-e-amal schedule murattab karen jis ke tahat mahana karaya baqaidagi se jama karaya jaye aur baqayajaat bhi qiston ke zariye ada kiye jaen. Unhon ne khabardar kiya ke muqarrara muddat mein amal daramad na hone ki soorat mein mutaaliqa qawaneen ke mutabiq karrawai amal mein layi jaye gi.

Ghair qanooni thade khatam karane ki hidayat

Ijlas mein yeh muamla bhi zer-e-behas aya ke mutaddid khokhon ke samne ghair qanooni thade qaim kar ke Karobar kiya ja raha hai, jabke baaz khokha malikan yeh thade doosron ke hawale kar ke karaya bhi wasool karte hain. Commissioner ne is amal ko qawaid o zawabit ke manafi qarar dete hue hidayat ki ke aise tamam ghair qanooni thade khatam karaye jaen aur sarkari amlaak ka istemal sirf muqarrara qawaid ke mutabiq yaqeeni banaya jaye.

Ijlas mein kaha gaya ke Metropolitan Corporation ki dukanon aur khokhon ke karayon ki baqaida wasooli, baqayajaat ki adaigi aur sarkari amlaak ke shaffaf intezam ko yaqeeni banane ke liye tamam zaroori iqdamat kiye jaen ge.

Tasweer: Bashukriya DGPR Balochistan