Commissioner Makuran Qadir Bakhsh Parkani ne Teaching Hospital Turbat mein 40 solar street lights ka iftitah kar diya

Turbat: Commissioner Makuran Division Qadir Bakhsh Parkani ne Teaching Hospital Turbat mein 40 solar street lights ka iftitah kiya, hospital ke mukhtalif shobon ka muayena kiya aur tibbi sahuliyat ki behtari par zor diya.

Yeh solar street lights Mirani Housing Scheme ke Corporate Social Responsibility (CSR) fund ke tahat nasb ki gayi hain. Mansube ka maqsad hospital ke ahate mein raat ke waqt muassir roshni ki faraahmi aur mareezon, timardaron aur amle ke liye mahfooz aur behtar mahaul faraham karna hai. Commissioner Makuran Division o Project Director Mirani Housing Scheme ki janib se is maqsad ke liye 37 lakh 89 hazar 947 rupay ki grant faraham ki gayi, jis ke zariye hospital ke ahate mein jadeed solar lighting system nasb kiya gaya.

Iftitahi taqreeb mein Deputy Commissioner Kech Yasir Iqbal Dashti, Additional Deputy Commissioner (Revenue) Maqbool Anwar, Medical Superintendent Teaching Hospital Dr Abdul Waheed Bulaidi, Principal Makuran Medical College Dr Afzal Khaliq, Dr Meeran Dashti, Dr Asif Baloch, Dr Ataullah, PA to Commissioner Nasir Hasan aur deegar doctors o mutaliqa afsaran bhi mojood the.

Iftitah ke baad Commissioner ne hospital ke mukhtalif shobajaat, bil-khusus emergency aur children emergency ward ka daura kiya aur wahan faraham ki jane wali tibbi sahuliyat ka jaiza liya. Unhon ne Deputy Commissioner Kech ko hidayat ki ke hospital mein jari taraqqiyati aur behtari ke mansube muqarrara muddat mein mukammal kiye jayen taake awam ko mazeed miyari tibbi sahuliyat faraham ki ja sakein.

Commissioner Makuran Division ne kaha ke awami falah ke mansubon mein bain-al-idara taawun nihayat aham hai, aur solar street lights ki tansib se hospital ke roshni ke nizam mein numayan behtari aayegi, jis se mareezon, timardaron aur hospital ke amle ko barah-e-raast faida pohnchega.

Medical Superintendent Dr Abdul Waheed Bulaidi ne Commissioner ka shukriya ada karte hue kaha ke solar street lights ki faraahmi se hospital ke mahaul aur sahuliyat mein numayan behtari aayegi aur ilaj ke liye aane wale shehriyon ko zyada sahulat muyassar hogi.

Tasveer: Bashukriya DG PR Balochistan