Commissioner Lasbela Saira Ata ka Workers Welfare School ka daura, aloodgi par Hub ki 6 sanati factories seal

Hub: Commissioner Lasbela Division Saira Ata ne industrial zone mein waqe Workers Welfare School ka daura kiya, tadrisi sargarmiyon ka jaiza liya aur talba o asatiza se mulaqat kar ke school ke masail maloom kiye. Is moqe par asatiza aur talba ne shikayat ki ke sanati aloodgi se tadrisi sargarmiyan mutasir ho rahi hain.

Commissioner ne masle ka notice lete hue khud factory ka daura kiya aur haqaiq janne ke baad mahkama tahaffuz-e-mahaulyat ke afsaran ko fori talab kar ke mahaulyati qawaneen par amal na karne wali zila Hub ki 6 sanati factories ko seal karne ka hukm diya. Environmental Protection Agency Act 2012 par amaldaramad ki advisory par Assistant Commissioner Hub Maheem Khan Gichki aur Deputy Director Environment Tariq ne mahaulyati team ke hamrah chhe sanati units seal kar diye.

Saira Ata ne kaha ke mahaulyati tahaffuz Act 2012 ki khilaf warzi par sakht karrawai hogi, EPA afsaran qawaneen par amaldaramad yaqeeni banayen aur faraiz mein ghaflat bartne wali inspection teamon ke khilaf bhi karrawai ki jaye gi. Deputy Director Environment ne bataya ke EPA regional office ki janib se 72 cases Environmental Tribunal mein zer-e-samaat hain.

Tasweer: Bashukriya DGPR Balochistan