Chief Secretary Shakeel Qadir Khan se Resolve to Save Lives ke sarbarah Tom Frieden ki mulaqat, Sehat mein takneeki muawanat par baat

Quetta: Chief Secretary Balochistan Shakeel Qadir Khan se Resolve to Save Lives (Resolve to Save Lives) ke Chief Executive Officer Tom Frieden ne mulaqat ki, jis mein Sehat ke shobe ko darpesh challenges aur is ki behtari ke liye mumkina taawun par tafseeli tabadla-e-khayal kiya gaya.

Mulaqat mein soobe mein shoba-e-Sehat ke nizam ki mazbooti, jaan bachane wale programs, wabai amraz se nipatne ki tayyari aur hangami tibbi khidmat ko mazeed muassar banane ke hawale se tafseeli baat cheet hui. Is mauqe par Secretary Sehat Mujeeb ur Rehman Panezai ne soobai hukumat ki jaanib se Sehat ke shobe ki taraqqi ke liye uthaye gaye iqdamat par tafseeli briefing di.

Chief Secretary Shakeel Qadir Khan ne soobe mein awami Sehat ke miyar ko mazeed behtar karne ke azm ka aadah kiya aur kaha ke awam ki Sehat aur falah-o-behbood ke liye tamam zaroori iqdamat kiye jayenge. Unhon ne Resolve to Save Lives ke saath mil kar kaam karne ki ahmiyat par zor dete hue kaha ke soobai hukumat Sehat ke shobe mein takneeki muawanat aur International tajurbaat se bharpoor faida uthane ki khwahan hai.

Chief Secretary ne Tom Frieden se khusoosan wabai amraz ki rok tham, hangami tibbi khidmat, bimariyon se bachao aur Sehat ke nizam ki mazbooti ke shobon mein takneeki muawanat aur tajurbati rehnumai faraham karne ka mutalba kiya.

Tom Frieden ne hukumat Balochistan ke azm ko saraha aur kaha ke Resolve to Save Lives soobe mein Sehat ki zaruriyat ke mutabiq takneeki muawanat, tarbiyati programs, miyari rehnumai aur behtareen International tareeqa-e-kaar faraham karne ke liye tayyar hai. Mulaqat mein tay paya ke aainda technical meetings aur site visits ke zariye mansoobon ki amali jaanch aur nafaz ko yaqeeni banaya jayega.

Tasveer: bashukriya DGPR Balochistan