Chief Secretary Shakeel Qadir Khan ki zair-e-sadarat intisad-e-Polio soobai task force ka ijlas, coverage mein kami par tashweesh

Quetta: Chief Secretary Balochistan Shakeel Qadir Khan ki zair-e-sadarat soobai task force baraye intisad-e-Polio ka ijlas munaqid hua, jis mein guzishta Polio muhim ki karkardagi ke jaize ke sath aainda muhim ki tayyariyon, micro planning, vaccination coverage aur darpesh challenges par tafseeli ghaur kiya gaya.

Ijlas mein wazir-e-azam ki focal person baraye Polio mohtarma Ayesha Raza ne bazariya video link shirkat ki, jabke soobai coordinator EOC Inamul Haq, Special Secretary Sehat Shahak Baloch, commissioners, deputy commissioners, District Health Officers aur deegar mutaliqa hukkam bhi shareek hue. Ijlas mein guzishta muhim ki karkardagi report pesh ki gayi aur aainda muhim ko muassir banane ke liye mahkamon aur zila intizamia ke iqdamat ka jaiza liya gaya.

Inkar aur zero dose bachche do alag masail

Chief Secretary Shakeel Qadir Khan ne kaha ke soobe se Polio virus ka mukammal khatma hukumat ki awleen tarjihat mein shamil hai aur is qaumi maqsad ke liye tamam dastiyab wasail beroe kaar laye jayen. Unhon ne kaha ke rukawaton ki nishandehi ke sath un ke mustaqil tadaruk ke liye bhi muassir iqdamat zaroori hain, aur aainda naslon ko mehfooz aur sehat mand mustaqbil dene ke liye Polio ka khatma nagozeer hai.

Unhon ne kaha ke Polio vaccine pilane se inkar aur zero dose bachchon ki maujoodgi do mukhtalif masail hain, jin ke asbab ka alag alag jaiza le kar muassir hikmat-e-amli ikhtiyar karna hogi. Unhon ne bilkhusus un Azla ki karkardagi par tashweesh zahir ki jahan guzishta Muhimmat mein vaccination coverage behtar rahi lekin haliya muhim mein kam hui, aur hidayat ki ke is kami ki wajuhat ka fori taayyun kar ke tadaruk kiya jaye.

Chief Secretary ne Polio teamon aur vaccinators ki hazri aur faraiz ki injam dehi yaqeeni banane ki hidayat ki aur kaha ke duty mein ghaflat ya adam dilchaspi dikhane wale ahlkaron ke khilaf qawaid ke mutabiq karrawai ki jaye, jabke jahan amle ki kami hai wahan mahkama Sehat fori iqdamat kare.

Unhon ne kaha ke Polio ka khatma naqabil-e-hasool hadaf nahin balke muassir hikmat-e-amli, zimmedari, ikhlas aur musalsal nigrani se hasil kiya ja sakta hai. Pakistan ne mukhtalif shobon mein numayan pesh raft ki hai aur kai shobon mein taraqqi yafta mumalik ke hum palla karkardagi dikhai hai, is liye Polio ke khatme ke liye bhi ijtimai azm darkar hai. Unhon ne wazeh kiya ke aainda muhim mein muqarrara ahdaf har soorat hasil kiye jayen aur kisi qism ki ghaflat, kotahi ya ghair zimmedari bardasht nahin ki jaye gi.

Qabl azin EOC coordinator Balochistan Inamul Haq ne sabiqa Polio Muhimmat ki karkardagi, maujooda soorat-e-haal aur aainda muhim ki tayyariyon par ijlas ko tafseeli briefing di.

Tasveer: Bashukriya DG PR Balochistan