Chief Secretary Shakeel Qadir Khan ki zair-e-sadarat ijlas, aath soobai mehkamon ne do sala karkardagi reports pesh kin

Balochistan: Chief Secretary Balochistan Shakeel Qadir Khan ki zair-e-sadarat munaqida ijlas mein mukhtalif soobai mehkamon ne apni do sala karkardagi reports pesh kin. Mehkama sehat, industries, schools, C&W, livestock, energy, mines and minerals aur science and IT ke secretaries aur senior hukkam ne apne shobon ki karkardagi, islahat aur mustaqbil ke laiha-e-amal par tafseeli briefing di.

Secretaries ne apni reports mein awami khidmat ke farogh, taraqqiyati mansoobon ki pesh raft aur wasail ke shaffaf istemal ki tafseelat share kin. Ijlas mein khas taur par digitization ke tahat online services, e-reporting aur digital management systems ke nifaz ko tez karne ki koshishon ko saraha gaya.

Awam ko barah-e-raast faida dene wale mansobe tarjeeh

Chief Secretary Shakeel Qadir Khan ne mehkamon ki briefing par itminan ka izhar karte hue kaha ke awam ki falah o behbood soobai hukumat ki awwaleen tarjeeh hai. Unhon ne hidayat ki ke awam tak barah-e-raast faida pahunchane wale mansobon ko tarjeeh di jaye aur un ki muqarrara waqt par takmeel yaqeeni banai jaye, jabke tamam mehkame awami khidmat aur falah o behbood mein mazeed behtari ke liye apni kawishen tez karein aur har satah par shaffafiyat ko fauqiyat dein.

Chief Secretary ne kaha ke digital services ke nifaz ko tez kiya jaye, ghair zaroori asamiyon ke khatme ka amal shaffaf andaz mein mukammal kiya jaye aur awami mansobon ke miyar aur sakht monitoring par koi samjhauta na kiya jaye. Unhon ne door daraz ilaqon mein bunyadi sahuliyat ki faraahmi par khusoosi tawajjoh dene ki bhi hidayat ki.

Tasveer: bashukriya DG PR Balochistan