Chief Secretary Balochistan Shakeel Qadir Khan ko secretaries ki do salah karkardagi report, digitisation par zor

Quetta: Chief Secretary Balochistan Shakeel Qadir Khan ki zair-e-sadarat ijlas mein secretaries ne mukhtalif mahkamon ki guzishta do baras ki karkardagi report pesh karte hue islahat, ahdaf ke hasool aur mustaqbil ke laaiha-e-amal se aagah kiya.

Ijlas mein CMIT, prosecution, bain-ul-mazahib hum ahangi, women development aur IPC ke secretaries ne apne shobon ki karkardagi, jari iqdamat, darpesh challenges aur aainda tarjihat par tafseeli briefing di, aur mahkamon mein nafiz islahat, service delivery mein behtari, intizami karkardagi aur awami sahulat ke farogh se mutalliq pesh raft par roshni dali.

Chief Secretary ne hidayat ki ke awami khidmat ka meyar mazeed behtar banane ke liye tamam mahkame apni karkardagi mein shaffafiyat, raftar aur jawabdehi yaqeeni banayen. Unhon ne mahkamon mein digitisation par khusoosi zor dete hue kaha ke jadeed Technology ke muassir istemal se sarkari umoor mein sahulat, taizi aur shaffafiyat laayi ja sakti hai. Is mauqe par online systems, digital record, e-governance aur marbut monitoring mechanism ko mazeed muassir banane ki zarurat par bhi zor diya gaya.

Shakeel Qadir Khan ne kaha ke soobai hukumat idara jati islahat, behtar governance aur awami khidmat ki barwaqt farahmi ke liye purazm hai, aur mahkame apni karkardagi mazeed behtar banate hue wazeh, qabil-e-amal aur nateeja khez road map ke mutabiq kaam karen.

Tasveer: Bashukriya DG PR Balochistan