Chief Minister Sarfraz Bugti se World Food Programme ki Country Director Anita Harsh ki mulaqat, ghizai qillat par baat cheet

Quetta: Chief Minister Balochistan Mir Sarfraz Bugti se World Food Programme Pakistan ki Country Director Anita Harsh ne mulaqat ki, jis mein Balochistan mein ghizai qillat ke khatme, ghizai tahaffuz, ghizaiyat ki behtari aur World Food Programme ke tahat jari mansoobon mein wusat sameet bahmi taawun mazeed barhane ke umoor par tafseeli tabadla-e-khayal kiya gaya.

Mulaqat mein Balochistan mein World Food Programme ke tahat jari mansoobon, soobe mein ghizai surat-e-haal aur mustaqbil ke iqdamat ka jaiza liya gaya. Ghizai qillat se nipatne, bachon aur khawateen ko miyari ghizaiyat ki faraahmi aur ghizai tahaffuz ke liye mushtarka iqdamat ko mazeed moassir banane par bhi baat cheet hui.

Ghizai qillat aik sangeen masla

Chief Minister Mir Sarfraz Bugti ne kaha ke Balochistan mein ghizai qillat aik sangeen masla hai jis ke tadaruk ke liye hukumat, aalmi idaron aur mutaalliqa sharakat daaron ke darmiyan marboot aur mushtarka iqdamat zaroori hain. Hukumat Balochistan ghizai qillat ke khatme aur ghizai tahaffuz ko behtar banane ke liye moassir iqdamat kar rahi hai aur is zimn mein aalmi idaron ke taawun ko ahmiyat deti hai.

Unhon ne kaha ke bachon aur khawateen ko munasib aur miyari ghizaiyat ki faraahmi sehat mand aur tawana muashre ki tashkeel ke liye bunyadi ahmiyat rakhti hai. Ghizai qillat ka barah-e-raast talluq insani sehat, bachon ki nashonuma aur mujmui insani taraqqi se hai, is liye is masle ke hal ke liye taweel-ul-muddat aur payedar iqdamat nagzeer hain.

Mir Sarfraz Bugti ne kaha ke hukumat Balochistan aur World Food Programme ke mushtarka iqdamat soobe mein ghizai qillat ke khatme aur ghizai tahaffuz ke farogh ke liye nateeja khez sabit honge. Unhon ne World Food Programme ke jari mansoobon ke liye soobai hukumat ki jaanib se har mumkin taawun ki yaqeen dehani karate hue kaha ke soobai hukumat bahmi taawun ka daira-e-kar mazeed wusat dene ke liye tayyar hai.

Chief Minister ne kaha ke hukumat Balochistan ghizai tahaffuz aur insani taraqqi ke shobon mein aalmi idaron ke sath taawun ko mazeed moassir banaye gi taake soobe ke awam, bil-khusoos bachon aur khawateen ko behtar ghizai sahuliyat faraham ki ja sakein. Mulaqat mein World Food Programme ki jaanib se Balochistan mein jari iqdamat aur mustaqbil ke programs par bhi tafseeli tabadla-e-khayal hua.

Tasveer: bashukriya DGPR Balochistan