Chief Minister Sarfraz Bugti ki zer-e-sadarat Hardening of the State Conference ka 26wan ijlas, Operation Shaban par itminan

Quetta: Chief Minister Balochistan Mir Sarfraz Bugti ki zer-e-sadarat riyasti difai conference (Hardening of the State Conference) ka 26wan ijlas Budh ko Quetta mein munaqid hua, jis mein soobe ki majmui security surat-e-haal, Dehshatgardi ke khilaf jaari iqdamat aur aman o istehkam ke liye wafaqi o soobai idaron ke bahmi taawun ka tafseeli jaiza liya gaya.

Forum ne Balochistan mein Pak Fauj, FC Balochistan aur police ke mushtarka Operation Shaban ki pesh raft par itminan ka izhar kiya aur dehshatgard anasir ke khilaf karrawaiyan mazeed mowassir andaz mein jaari rakhne ke azm ka iada kiya.

Ijlas ke shurka ne Hanna Urak aur Mangi Dam ke shuhada ko khiraj-e-aqeedat pesh kiya aur is azm ka izhar kiya ke shuhada ki qurbaniyan raigan nahin jaayengi aur Balochistan ke aman o istehkam ke liye Dehshatgardi ke khilaf karrawaiyan poori quwwat se jaari rahengi.

Sharpasandon aur sahulat karon ko mantiqi anjaam tak pahunchayenge

Chief Minister Mir Sarfraz Bugti ne ijlas se khitab karte hue kaha ke Dehshatgardi aik qaumi masla hai jis se nimatne ke liye mulk ki siyasi aur askari qiyadat awam ke taawun se mushtarka tor par kaam kar rahi hai. Unhon ne kaha ke sharpasand anasir aur un ke sahulat karon ko mantiqi anjaam tak pahunchaya jayega aur riyasat dushman anasir ke liye Balochistan mein koi jagah nahin.

Chief Minister ne kaha ke soobe mein governance ko mazeed mowassir banane ke liye islahati iqdamat uthaye ja rahe hain taake riyasti idaron ki karkardagi mein behtari aaye aur awam ko behtar khidmaat ki faraahmi yaqeeni banayi ja sake.

Unhon ne kaha ke soobai hukumat security forces ke saath mukammal hum ahangi ke tehat na sirf Aman o Aman ke qiyam balke Balochistan ki tameer o taraqqi, khusoosan door uftada aur pasmanda ilaqon mein taraqqiati mansooboon par bhi bharpoor tawajjoh de rahi hai, kyunke paidar aman aur taraqqi aik doosre se jure hue hain.

Ijlas mein wafaqi o soobai idaron, qanoon nafiz karne wale mahkamon aur security forces bashumul Pakistan Army, Frontier Corps, Pakistan Coast Guards, police, FIA, Customs aur deegar mutalliqa idaron ke numainDon ne shirkat ki. Ijlas ke ikhtitam par is azm ka iada kiya gaya ke Balochistan mein aman, riyasti rit ke istehkam aur awam ke tahaffuz ke liye tamam mutalliqa idare bahmi taawun aur marbut hikmat-e-amali ke tehat apni zimmedariyan anjaam dete rahenge.

Tasveer: Bashukriya DG PR Balochistan