Chief Minister Sarfraz Bugti ki plane haadsay mein jaanein bachanay walay nojawan Hikmatullah se mulaqat, taareefi certificate pesh

Quetta: Chief Minister Balochistan Mir Sarfraz Bugti se Nawan Killi mein tarbiyati plane ke haadsay ke dauran insani jaanein bachanay ke liye aagay barhnay walay nojawan Hikmatullah ne mulaqat ki.

Is moqay par Chief Minister ne nojawan ki bahaduri aur jurat ko sarahtay huye hukumat Balochistan ki janib se unhein taareefi certificate pesh kiya.

Chief Minister ne nojawan Hikmatullah ke jazba-e-insaniyat ko khiraj-e-tehseen pesh kartay huye kaha ke unhein aise bahimmat nojawanon par fakhr hai jo mushkil aur hangami halaat mein apni jaan ki parwa kiye baghair doosron ki madad ke liye aagay barhtay hain. Unhon ne kaha ke Hikmatullah jaise nojawan Balochistan ka qabil-e-fakhr sarmaya aur doosron ke liye qabil-e-taqleed misaal hain.

Security forces aur awam

Chief Minister ne kaha ke hamari security forces mulk o qaum ke tahaffuz aur aik mehfooz o roshan mustaqbil ke liye qurbaniyan de rahi hain. Nawan Killi mein plane haadsay ke maqam par insani jaanein bachanay ke liye nojawanon ka aagay barhna is haqeeqat ka amali izhar hai ke Balochistan ke awam apni security forces ke saath mohabbat aur wabastagi rakhtay hain.

Mir Sarfraz Bugti ne kaha ke bebunyad propaganda ke zariye Balochistan ke awam aur security forces ke darmiyan faslay paida karne ki koshishein haqeeqat ke bar aks hain. Unhon ne kaha ke aise waqiat is amr ki akkasi kartay hain ke Balochistan ke awam har jagah aur har haal mein apni bahadur security forces ke shana ba shana kharay hain.

Chief Minister ne kaha ke insaniyat ki khidmat, jurat aur doosron ki jaan bachanay ke liye amali kirdar ada karna qabil-e-tehseen amal hai. Unhon ne is azm ka izhar kiya ke muashray mein aise musbat kirdaron ki hausla afzai jari rakhi jaye gi taake nojawanon mein khidmat-e-khalq, zimmedari aur qaumi yakjehti ke jazbaat mazeed farogh payein.