Chief Minister Sarfraz Bugti ki Naseerabad ke lok gulukar Gul Mir Jamali se Chief Minister Secretariat mein mulaqat

Quetta: Chief Minister Balochistan Mir Sarfraz Bugti ne ganon ke zariye apni mohabbat aur aqeedat ka izhar karne wale Naseerabad ke maroof lok gulukar Gul Mir Jamali ko Chief Minister Secretariat madoo kar ke un se mulaqat ki.

Mulaqat mein Gul Mir Jamali ne Chief Minister se mulaqat ko apni zindagi ka yadgar lamha qarar dete hue un ka shukriya ada kiya aur apne riwayati andaz mein mohabbat bhare geet pesh kiye. Fankar ne Chief Minister ki maujoodgi mein gana bhi sunaya, jise Mir Sarfraz Bugti ne saraha aur un ki fankarana salahiyaton ki tareef ki.

Lok fankar Balochistan ki saqafat ke safeer

Chief Minister Mir Sarfraz Bugti ne kaha ke Balochistan ke lok fankar soobe ki saqafat, rawayaat aur musbat tashakhus ke haqiqi safeer hain. Maqami fan aur fankaron ki hausla afzai hukumat ki zimmedari hai aur aiseba-salahiyat afrad ki sarparasti jari rakhi jaye gi.

Unhon ne Gul Mir Jamali ke khuloos, mohabbat aur fan se wabastagi ko sarahte hue kaha ke fan logon ke dilon ko jodne aur muashre mein musbat paigham aam karne ka moassir zariya hai. Chief Minister ne azm zahir kiya ke Balochistan ke saqafati wirse ke farogh aur maqami fankaron ki falah-o-behbood ke liye hukumat har mumkin iqdamat jari rakhe gi.

Is mauqe par Gul Mir Jamali ne Chief Minister ki mohabbat, shafqat aur hausla afzai par izhar-e-tashakkur karte hue kaha ke un se mulaqat un ke liye azaz hai aur woh apni awaz ke zariye Balochistan ki saqafat aur mohabbat ke paigham ko mazeed farogh dete rahenge.

Wazeh rahe ke Balochistan ke door uftada ilaqe Naseerabad se talluq rakhne wale lok gulukar Gul Mir Jamali ne Social Media page Quetta News Network ko diye gaye ek interview mein Chief Minister Balochistan se milne ki khwahish zahir ki thi, jis par Chief Minister Secretariat ki janib se unhein madoo kiya gaya.

Tasveer: Bashukriya DG PR Balochistan