Chief Minister Sarfraz Bugti ki Islamabad mein Bilawal Bhutto Zardari se mulaqat, jald All Parties Conference bulane ka elan

Islamabad: Chief Minister Balochistan Mir Sarfraz Bugti ne Zardari House Islamabad mein Pakistan PPP ke chairman Bilawal Bhutto Zardari se mulaqat ki, jis mein Balochistan ki mujmui siyasi, intizami aur Aman o Aman ki surat-e-haal par tafseeli tabadla-e-khayal kiya gaya.

Mulaqat ke dauran Chief Minister ne chairman Bilawal Bhutto Zardari ko soobe ki maujooda intizami o siyasi surat-e-haal aur Dehshatgardi ke haliya waqiat ke tanazur mein hukumati iqdamat se agah kiya.

Saniha Ziarat: judicial commission qayam, All Parties Conference jald

Chief Minister ne briefing mein bataya ke Ziarat saniha ke mutasira khandanon ki diljoi aur un ke jaiz mutalibat ki takmeel ke liye hukumat ne bharpoor iqdamat kiye hain, jabke lawahiqeen ke mutalibe par saniha ki tehqiqat ke liye judicial commission bhi qayam kar diya gaya hai taake haqaiq samne laye ja saken.

Chief Minister ne mazeed bataya ke Balochistan mein paidar aman ke qayam aur siyasi hum ahangi ke farogh ke liye jald All Parties Conference munaqid ki jayegi, jis mein parliament ke andar maujood siyasi jamaaton ke sath sath parliament se bahar ki siyasi jamaaton ko bhi shirkat ki dawat di jayegi taake Dehshatgardi aur aman o istehkam ke hawale se mushtarka lai-e-amal murattab kiya ja sake.

Bilawal Bhutto: Balochistan ke masail ka hal muzakraat mein hai

Is moqe par Bilawal Bhutto Zardari ne Dehshatgardi ki haliya lehar mein shaheed hone wale Pak fauj, FC aur police ke jawanon ko khiraj-e-aqeedat pesh kiya aur kaha ke woh Dehshatgardi ke haliya sanihat mein shaheed hone wale afrad ke lawahiqeen ke dukh aur taklif ko mehsoos karte hain aur un ke gham mein barabar ke shareek hain.

Chairman PPP ne saniha Ziarat ke lawahiqeen ke dukhon ke izale aur muzakrati amal ko kamyab banane ke liye Chief Minister Mir Sarfraz Bugti ke iqdamat ko sarahte hue kaha ke aap ne is mushkil surat-e-haal mein musbat aur zimmedarana kirdar ada kiya. Unhon ne muzakrati amal ki kamyabi mein kirdar ada karne wali opposition jamaaton ka bhi shukriya ada kiya.

Bilawal Bhutto Zardari ne kaha ke Balochistan ke siyasi masail ka paidar hal sirf muzakraat aur siyasi mukalme mein hai, aur Pakistan PPP hamesha siyasi jamaaton ke sath bamaqsad dialogue par yaqeen rakhti hai, khwah woh hukumat mein hon ya hizb-e-ikhtilaf mein.

Unhon ne is azm ka aada kiya ke Dehshatgardi ke khilaf Pakistan PPP ka moaqqaf pehle din se wazeh aur ghair mutazalzil hai, aur party Dehshatgardi ke nasoor ke khilaf sisa pilayi hui deewar ki tarah riyasti idaron aur awam ke shana ba shana khadi rahegi.

Tasveer: Bashukriya DG PR Balochistan