Chief Minister Sarfraz Bugti: Balochistan Institute of Cardiovascular Diseases takmeel ke qareeb, zarai solarization kamyab

Islamabad: Chief Minister Balochistan Mir Sarfraz Bugti ne kaha hai ke Balochistan mein amraz-e-qalb ke ilaj ke liye jadeed aur miari tibbi sahuliyat ki farahmi mein aham pesh raft hui hai. Balochistan Institute of Cardiovascular Diseases (BICVD) takmeel ke marahil mein hai, jabke Sheikh Zayed Hospital Quetta bhi amraz-e-qalb ke ilaj ka aik moasir aur faal markaz hai.

Chief Minister ne in khayalat ka izhar Balochistan National Workshop ke shurka aur soobe ke umaaidin ki wazir-e-azam Pakistan Muhammad Shehbaz Sharif se mulaqat ke mauqe par shurka ke sawalat ke jawab dete hue kiya. Balochistan se mutaliq sawalat ke jawab ke liye wazir-e-azam Muhammad Shehbaz Sharif ne khusoosi tor par Chief Minister Balochistan ko mic diya.

Amraz-e-qalb ke do idare

Mir Sarfraz Bugti ne bataya ke Quetta mein amraz-e-qalb ke aik hospital ke qayam ka elan kai saal qabl kiya gaya tha, taham is mansoobe par amli pesh raft na ho saki. Baad azan hukumat-e-Balochistan ne soobe mein apne do aham idare qayam kiye, jin mein Sheikh Zayed Hospital Quetta aur Balochistan Institute of Cardiovascular Diseases shamil hain.

Unhon ne kaha ke Sheikh Zayed Hospital Quetta behtareen andaz mein khidmat anjam de raha hai, aur Balochistan Institute of Cardiovascular Diseases ke faal hone se soobe ke awam ko amraz-e-qalb ke ilaj ki jadeed aur miari sahuliyat apne hi soobe mein maisar aayengi. Sehat ke shobe mein awam ko miari tibbi sahuliyat ki farahmi hukumat-e-Balochistan ki aham tarjihat mein shamil hai.

Zarai solarization: samarat aakhri sarif tak

Chief Minister ne Balochistan mein zarai shobe ki solarization ke mansoobe ko bhi aik aham kamyabi qarar dete hue kaha ke soobe ke zamindaron ko bijli ke buhran se relief dene ke liye yeh mansooba intihai kamyabi se mukammal kiya gaya hai. Mansoobe ka aik aham pehlu yeh hai ke is ke samarat barah-e-raast aakhri sarif tak pahunche hain aur zamindaron ko un ke gharon tak maali fawaid muntaqil hue.

Unhon ne wazir-e-azam Muhammad Shehbaz Sharif, wafaqi wazir Sardar Awais Ahmad Khan Leghari, mutaliqa wafaqi o soobai hukkam aur mansoobe ki takmeel mein kirdar ada karne wali team ki kawishon ko saraha. Mir Sarfraz Bugti ne kaha ke Balochistan ke zamindar solarization mansoobe ke musbat nataij ko qadr ki nigah se dekhte hain, kyunke is iqdam se zarai shobe ko bijli ki farahmi mein darpesh mushkilat kam hui hain, jabke QESCO ke bijli ke akhrajat mein bhi numayan kami aayi aur qaumi wasail ki bachat mumkin hui.

Chief Minister Balochistan ne kaha ke wafaqi aur soobai hukumaton ke darmiyan moasir taawun ke nateeje mein Balochistan mein awami falah o behbood aur maashi taraqqi ke bade mansoobe kamyabi se aage barhaye ja rahe hain, aur sehat, zaraat, tawanai aur deegar bunyadi shobon mein awam ko behtar sahuliyat ki farahmi ke liye hukumat apni koshishen jari rakhegi.

Tasveer: Bashukriya DG PR Balochistan