Chaman: DC Habib Ahmed Bangulzai ki zer-e-sadarat Polio muhim ke pehle roz ka jaiza, door daraz ilaqon tak rasai ki hidayat

Chaman: Zila Chaman mein jari insidad-e-Polio muhim ke pehle roz ki karkardagi ka jaiza lene ke liye evening review ijlas Deputy Commissioner Habib Ahmed Bangulzai ki zer-e-sadarat munaqid hua, jis mein mehkama Sehat Chaman ke afsaran, Polio afsaran, zila Polio afsar Muhammad Ashraf Achakzai aur deegar mutalliqa ahalkaron ne shirkat ki.

Polio teemon ke afsaran ne muhim ke pehle roz ki karkardagi, qatre pilane ke amal, field sargarmiyon aur darpesh masail par briefing di. Ijlas mein security intezamat ka bhi jaiza liya gaya aur teemon ko mehfooz mahaul dene ke liye security idaron aur mutalliqa mehkamon ke darmiyan moassar rabte par zor diya gaya.

Deputy Commissioner ne hidayat ki ke paanch saal tak ka koi bachcha qatre pilaye baghair na chhora jaye aur zila ke door daraz aur dushwar guzar ilaqon samet har gali, mohalle aur kone tak teemon ki rasai yaqeeni banai jaye. Unhon ne wazeh kiya ke muhim ke dauran kisi maslehat ya narmi ka muzahira na kiya jaye, field teemon ki musalsal nigrani ho aur reh jane wale bachchon ki nishandahi kar ke unhein har surat qatre pilaye jayen.

Tasveer: Bashukriya DG PR Balochistan