Chairman Balochistan Revenue Authority ki DG Excise South Zone se Hub mein mulaqat, tax net barhane par ittefaq

Hub: Balochistan Revenue Authority (BRA) ke chairman Abdullah Khan ne Director General Excise, Taxation and Anti-Narcotics Department (South Zone) Muhammad Zaman se mulaqat ki.

Mulaqat mein tax islahat, soobai revenue mein izafe, tax wusooli ke nizam mein behtari, tax dehendgan ko sahuliyat ki faraahmi, tax net ko wusat dene, idaraati rabita kari aur dono mahkamon ke darmiyan bahami taawun se mutaliq mukhtalif iqdamat par tabadla-e-khayal kiya gaya.

DG Excise Muhammad Zaman ne mahkama Excise ke revenue wusooli ke nizam aur ise mazeed mouassar o shaffaf banane ke iqdamat se aagah kiya. Unhon ne kaha ke jadeed taqazon ke mutabiq tax nizam ko behtar bana kar revenue wusooli mein mazeed behtari layi ja sakti hai.

Is mauqe par dono janib se Chief Minister Balochistan Mir Sarfraz Bugti ke vision ke mutabiq soobe mein tax net ko wusat dene aur soobe ke apne zaraye se hasil hone wali amdan mein izafe ke liye mushtarka koshishein jari rakhne ke azm ka izhar kiya gaya.

Mulaqat mein Balochistan Revenue Authority aur mahkama Excise and Taxation ke darmiyan rabita kari aur maloomat ke tabadle ko mazeed mouassar banane par zor diya gaya, take tax qawanin par amal-daramad behtar, tax dehendgan ko sahuliyat ki faraahmi mouassar aur mahsulat ki wusooli ka nizam mazeed faal banaya ja sake. Tax umoor par bahami taawun aur rabita kari jari rakhne par ittefaq kiya gaya.

Tasveer: Bashukriya DGPR Balochistan