Chagai ke ilaqe Dignan mein security forces ka operation, 3 dehshatgard halak, thikane tabah

Chagai: Zila Chagai ke dushwar guzar aur sanglakh pahari ilaqe Dignan mein security forces ne aik pecheeda aur munazzam operation karte hue dehshatgardon ke thikanon aur ghaaron tak rasai hasil ki.

Shadeed firing ke tabadle ke baad 3 dehshatgard halak jabke mutaddid thikane aur panah gahein tabah kar di gayin. Poore operation ke dauran security forces ka koi jani nuqsan nahin hua.

Karrwai ne dehshatgardon ki maujoodgi aur operational salahiyat ko shadeed dhakka pahunchaya aur yeh wazeh kar diya ke dushwar guzar pahari ilaqon aur door daraz thikanon ko mehfooz panah gah nahin banne diya jaye ga.

Security forces ne aik baar phir do tok moaqqaf diya hai ke Dehshatgardi ke liye zero tolerance ki policy barqarar rahe gi. Aman, shehriyon ke tahaffuz aur riyasti writ ko challenge karne wale anasir ke khilaf karrwaiyan musalsal jari rahein gi.

Paigham wazeh hai: Dehshatgardi ke liye koi riayat nahin, koi mehfooz thikana nahin.