BUITEMS Quetta mein photography, khaka nigari aur painting muqabla, fun paron se Balochistan mein pani ke tahaffuz ka paigham

Quetta: Balochistan University of Information Technology, Engineering and Management Sciences (BUITEMS) mein photography, khaka nigari aur painting ke muqable aur numaish ka inqad kiya gaya, jis ka maqsad funun-e-latifa ke zariye Balochistan mein pani ke intezam, Zaraat, livestock aur rangelands se mutaalliq awami shaoor aur aagahi ko farogh dena hai.

Yeh taqreeb «Aagahi barhane aur knowledge management project» ke tahat munaqid ki gayi, jise European Union (EU) ne Revival of Balochistan Water Resources Programme (RBWRP) ke tahat maali moaawanat farahem ki hai, jabke mansube par BUITEMS ne Aqwam-e-Muttahida ke idara baraye khurak o Zaraat (FAO) Pakistan ke taawun se amalderamad kiya.

Taqreeb mein vice chancellor BUITEMS Professor Dr Khalid Hafeez, pro vice chancellor Mir Waise Kasi, registrar Jamal Mustafa, director communication Syed Dara Shikoh Amir, director ICRMS and Quality Dr Zahid Rauf aur team lead Professor Dr Jan Muhammad samet asatza, talba aur deegar afraad ne shirkat ki.

Fun paron mein pani, Zaraat aur mahaul

Numaish mein talba aur nojawan fankaron ne Balochistan ke munfarid jughrafiyai, mahauliyati aur zarai halaat par tasaweer, khake aur paintings pesh kiin, jin ke zariye sooba mein pani ki ahmiyat, mahdood aabi wasail, pani ke moassir aur zimmedarana istemal, zarai sargarmiyon, livestock, qudrati charagahon aur mahaul ke tahaffuz ko ujagar kiya gaya.

Muqarrireen ne kaha ke Balochistan mein pani intihai aham qudrati waseela hai aur sooba ki Zaraat, livestock, maeeshat aur mahauliyati tawazun ka barah-e-raast inhisar pani ke moassir intezam par hai. Mahdood aabi wasail ke tahaffuz aur paedar istemal ke liye jadeed ilm, tehqeeq, behtar mansoobabandi aur awami aagahi waqt ki aham zaroorat hai.

Unhon ne kaha ke nojawan nasl ko pani ke tahaffuz aur qudrati wasail ke zimmedarana istemal se aagah karna paedar taraqqi ke liye nagzeer hai, aur photography, khaka nigari aur painting jaise takhleeqi zaraye nojawanon ki salahiyatein ujagar karne ke sath pecheeda mahauliyati o samaji masail ko aam fehm andaz mein awam tak pahunchate hain. Shurka ne talba ki takhleeqi kawishon ko saraha.

Muntazimeen ke mutabiq is sargarmi ka bunyadi maqsad Balochistan ke aabi o qudrati wasail se mutaalliq maloomat aam karna, shaoor ujagar karna aur nojawanon ko sooba ke aham mahauliyati o maeeshati masail se jodna hai. Taqreeb ke ikhtitam par vice chancellor ne numayan karkardagi dikhane wale talba mein asnad taqseem kiin.

Tasweer: Bashukriya DGPR Balochistan