Barkhan: BHU Rakhni mein doctor ki adam mojoodgi par ehtijaj, Deputy Commissioner ne inquiry ka hukm de diya

Barkhan: Sub tehsil Baghao mein guzishta shab do groupon ke darmiyan firing ke tabadle mein Ramyani biradari ke do afraad zakhmi ho gaye, jinhein foori tibbi imdad ke liye BHU Rakhni muntaqil kiya gaya.

Zaraye ke mutabiq BHU Rakhni mein doctor ki adam mojoodgi aur barwaqt tibbi imdad na milne par lawahiqin ne ehtijaj karte hue laash Rakhni bypass, N-70 par rakh di, jis ke baais shahrah par traffic ki rawani mutasir hui.

Assistant Commissioner ka daura, show-cause notice jari karne ka hukm

Itla milte hi Assistant Commissioner Tehsil Rakhni Fahad Hussain Umrani ne foori notice lete hue BHU Rakhni ka daura kiya aur markaz-e-sehat mein doctors o tibbi amle ki hazri, duty roster aur zakhmiyon ko faraham ki jane wali tibbi sahuliyat ka jaiza liya.

Waqie ka notice lete hue Deputy Commissioner Barkhan Saeed ur Rehman Kakar, DNPPHI aur DHO Barkhan ki jaanib se ghair hazir doctors aur mutaliqa tibbi amle ko show-cause notice jari karne ke ehkamat diye gaye. Deputy Commissioner ne zakhmi afraad ki amad ke waqt amle ki mubayyana ghair mojoodgi se mutaliq shikayat par baqaida inquiry ka hukm dete hue Assistant Commissioner Rakhni Fahad Hussain Umrani ko inquiry officer muqarrar kiya aur unhein waqie ke tamam pehluon ka jaiza le kar agle roz tak tafseeli report pesh karne ki hidayat ki.

Deputy Commissioner ne wazeh kiya ke sarkari marakiz-e-sehat mein awam ko barwaqt tibbi sahuliyat ki faraahmi aur amle ki hazri ko yaqeeni banana intizamiya ki awwaleen tarjihat mein shamil hai, jabke ghaflat ya kotahi ki soorat mein qawaid o zawabit ke mutabiq karrawai amal mein lai jaye gi. Intizamiya ke mutabiq inquiry report ki roshni mein haqaiq samne aane ke baad mazeed karrawai ka faisla kiya jaye ga.

Assistant Commissioner Fahad Hussain Umrani ne kaha ke awam ko bunyadi tibbi sahuliyat ki faraahmi mein kisi qism ki ghaflat bardasht nahin ki jaye gi. Inquiry ke dauran jis ahlkar ki duty se ghair hazri ya ghaflat sabit hui, us ke khilaf qanoon o zabte ke mutabiq karrawai hogi, aur sarkari marakiz-e-sehat mein hangami soorat-e-haal ke dauran foori tibbi imdad ki faraahmi har soorat yaqeeni banai jaye gi.

Intizamiya ki jaanib se foori karrawai aur zimmedaran ke taiyun ki yaqeen dehani par lawahiqin ne ehtijaj khatam kar diya, jis ke baad Rakhni bypass, N-70 ko traffic ke liye khol diya gaya.

Tasveer: Bashukriya DGPR Balochistan