Barkhan: 2 November se shuru hone wali insidad-e-Polio muhim ki tayyariyon par DPEC ijlas, 100 feesad coverage ka hadaf

Barkhan: Deputy Commissioner Barkhan Saeed ur Rehman Kakar ki zer-e-sadarat November 2026 ki khusoosi insidad-e-Polio muhim (SNID) ki tayyariyon ke silsile mein zila Polio Eradication Committee (DPEC) ka ijlas munaqid hua, jis mein muhim ke mooasir inaqad, intizami umoor aur bachon ko qatray pilane ki hikmat-e-amali ka tafseeli jaiza liya gaya.

Ijlas mein District Health Officer Dr Muhammad Hassan Domki, Assistant Commissioner Barkhan, Deputy District Health Officer, DSM PPHI, N-Stop Officer, alami idara-e-Sehat (WHO) ki team, Union Council Medical Officers (UCMOs) aur mutaliqa mahkamon ke numainDon ne shirkat ki.

Ijlas mein 2 November 2026 se shuru hone wali muhim ke micro plans, guzishta muhim ki karkardagi, vaccine se inkar ke cases, adam-e-dastiyab bachon (NAs) aur qatray peene se reh jane wale bachon ke aadad-o-shumar ka jaiza liya gaya. Kam coverage wali Union Councils (LPUCs) aur khusoosi tawajjo ke mutaqazi ilaqon (MMP Areas) mein coverage behtar banane ke iqdamat par bhi ghaur kiya gaya.

Deputy Commissioner ne hidayat ki ke tamam idare bahami rabte aur mooasir hikmat-e-amali ke tahat zimmedariyan ada karein, muhim ki musalsal nigrani ho, inkar ke cases ka mooasir tadaruk kiya jaye aur reh jane wale bachon tak rasai yaqeeni banai jaye. Ijlas ke ikhtitam par numainDon ne 100 feesad coverage ke hadaf ke husool aur zila Barkhan ko Polio se paak banane ke azm ka izhar kiya.

Tasveer: bashukriya DGPR Balochistan