Balochistan Textbook Board ki teen roza tarbiyati workshop shuru, secretary secondary Taleem ne board ki official website ka iftitah kiya

Quetta: Balochistan Textbook Board ke zere-ehtimam book writers, editors aur jaiza lene walon ki istedad-e-kaar mein izafe, darsi kutub ke miyar ko mazeed behtar banane aur jadeed taqazon se hum ahang karne ke liye teen roza tarbiyati workshop ka inaqad kiya gaya, jis ki iftitahi taqreeb se secretary secondary Taleem Lal Jan Jafar aur chairman Balochistan Textbook Board Dr Gulab Khan Khilji ne khitab kiya.

Is mauqe par secretary Balochistan Textbook Board Dr Niaz Tareen, director Idara-e-Nisabiyat Naimatullah Khan Kakar, director PITE Fatima Mandokhail ke alawa mahkama Taleem ke mukhtalif mazameen ke book writers (authors), kitabon ka jaiza lene wale professors, assistant professors, mahkame ke PhD doctors, mahkama Taleem ke mahireen, aala hukkam aur Balochistan Textbook Board ke afsaran ne shirkat ki.

Secretary secondary Taleem Lal Jan Jafar ne kaha ke miyari aur muassir darsi kutub ki tayyari taleemi nizam ki behtri mein bunyadi ahmiyat rakhti hai. Talba ko miyari, aasan fahm, tehqeeqi aur jadeed taqazon se hum ahang taleemi mawad ki faraahmi ke liye book writers, editors aur jaiza karon ki pesha waranah salahiyaton mein musalsal izafa nagzeer hai. Unhon ne kaha ke workshop ka bunyadi maqsad kitabon ki tayyari ke mukhtalif marahil se wabasta mahireen ki istedad-e-kaar behtar banana, jadeed taleemi usoolon se aagahi faraham karna aur darsi kutub ke miyar, mawad, zabaan, uslub aur taleemi ifadiyat ko mazeed muassir banana hai.

Dr Gulab Khan Khilji ne kaha ke darsi kitab mahaz maloomat ka majmua nahin balke talba ki fikri, ilmi aur takhleeqi salahiyaton ki tashkeel ka aham zariya hai, is liye is ki tayyari mein miyar, drustgi, tehqeeq, zabaan o bayan aur talba ki umr aur taleemi satah ko khusoosi tor par madde nazar rakhna zaroori hai. Unhon ne workshop ke inaqad ko khush aaind qarar dete hue kaha ke aise programs se writers, editors aur jaiza karon ko jadeed tariqa-e-tadrees, nisabi zaruriyat aur muassir taleemi mawad ki tayyari mein apni salahiyatein behtar banane ka mauqa milta hai.

Chairman Balochistan Textbook Board ne azm zahir kiya ke board soobe ke talba ko miyari aur jadeed taleemi kutub ki faraahmi ke liye apni zimmedariyan bharpoor andaz mein ada karta rahega aur darsi kutub ka miyar behtar banane ke liye mahireen-e-Taleem, kutub ke authors aur deegar mutalliqa shobon ke mahireen se istifada kiya jaye ga. Teen roza workshop ke dauran shurka ko darsi kutub ki muassir tehreer, tadween, jaiza, mawad ki drustgi, zabaan o bayan ki behtri aur jadeed taleemi taqazon ke mutabiq nisabi mawad ki tayyari ke mukhtalif pehluon se aagah kiya jaye ga.

Textbook Board ki official website

Is mauqe par secretary secondary Taleem Lal Jan Jafar ne Balochistan Textbook Board ki official website ka bhi iftitah kiya, jo mukammal nisab ki e-books, video courses, nisab ke record aur professors, doctors aur lecturers tak rasai faraham kare gi. Website ki ek aham khusoosiyat yeh bhi hai ke talba aur asatiza apne mutalia karda mawad par raye aur tasurat ke liye feedback aur review de sakein ge, jis se asatiza aur deegar talba ko mufeed maloomat hasil hon gi aur soobe bhar ke tamam bachon ko yaksan taleemi mawaqe milein ge taake woh apne roshan mustaqbil ki bunyad rakh sakein.

Tasveer: Bashukriya DGPR Balochistan