Balochistan Revenue Authority ka audit unit faal, recovery ka daira poore soobe tak: wazir-e-khazana Shoaib Nausherwani ki zer-e-sadarat ijlas

Quetta: Soobai wazir-e-khazana Balochistan Mir Shoaib Nausherwani ki zer-e-sadarat Balochistan Revenue Authority (BRA) ka aham ijlas munaqid hua, jis mein secretary finance Jahangir Kakar, special secretary finance Arif Achakzai, chairman Balochistan Revenue Authority Abdullah Khan aur deegar mutaliqa hukkam ne shirkat ki.

Ijlas mein BRA ki mujmui karkardagi, soobai mehsulat mein izafe, tax nizam ko mazeed moassar aur shaffaf banane, wajibat ki barwaqt wusooli aur revenue intizamat ka tafseeli jaiza liya gaya aur idare ko mazeed mustahkam banane ke liye aham faislay kiye gaye.

Ijlas ke aham faislay

BRA ke audit unit ko mazeed faal banane aur uski istedad-e-kar barhane ka faisla kiya gaya taake tamam karobari idaron, companiyon aur service providers ke tax muamalat mein shaffafiyat, ehtesab aur tax qawanin par moassar amal-daramad yaqeeni banaya ja sake.

Soobe bhar mein recovery ka amal tez karne aur services sector mein tax network ko wusat dene ka bhi faisla hua. Hotel malikan, sanati idaron, factories aur mukhtalif thekedaron ke zimme wajib-ul-ada tax aur deegar mali wajibat ki jald aur moassar wusooli par zor diya gaya.

Ijlas mein ittefaq kiya gaya ke recovery aur monitoring ka nizam chand shehron tak mehdood rakhne ke bajaye poore Balochistan tak tawseei di jaye, jabke Gwadar aur Hub jaise aham maashi o sanati marakiz mein BRA ke daftar ko mazeed faal aur mustahkam banaya jaye taake maqami sath par tax wusooli aur monitoring barwaqt aur moassar andaz mein ho sake.

Wazir-e-khazana ki hidayat

Soobai wazir-e-khazana Mir Shoaib Nausherwani ne kaha ke soobai hukumat maaliyati nazm o zabt, shaffaf tax nizam aur mehsulat mein izafe ke liye jamia islahat par amal pera hai. Unhon ne hidayat ki ke revenue ahdaf ke husool, tax qawanin par moassar amal-daramad, wajibat ki barwaqt wusooli aur awam ko behtar sahuliyat ki faraahmi ke liye koshishen mazeed tez ki jayen taake Balochistan maali tor par mazeed mustahkam aur khud-kafeel ban sake.

Unhon ne hidayat ki ke idare ko darpesh tamam intizami, maali aur taknici masail tarjihi bunyadon par hal kiye jayen, aur BRA ke wasail mein izafe, amle ki paishawarana tarbiyat, jadeed Technology ke moassar istemal aur idare ki mujmui istedad-e-kar barhane ke liye jamia iqdamat kiye jayen.

Wazir-e-khazana ne Balochistan Revenue Authority aur Federal Board of Revenue (FBR) ke darmiyan mukammal hum ahangi aur moassar rabta-kari yaqeeni banane aur tax wusooli ke tareeqa-e-kar ko waqtan fawqtan FBR ke jadeed nizam se hum ahang karne ki hidayat ki.

Unhon ne BRA ke afsaran aur amle ko mulk ke miyari tarbiyati idaron mein jadeed taqazon se hum ahang tarbiyat faraham karne ki hidayat ki taake tax chori aur tax se bachne wale afrad, karobari idaron, sanati units aur deegar service faraham karne walon ki moassar nishandehi karke qanoon ke mutabiq karrawai ki ja sake. Unhon ne salana revenue ahdaf ke husool ke liye tax aur audit ke shobon mein aala salahiyat, tajurbe aur paishawarana maharat rakhne wale mahireen ki khidmat hasil karne ki bhi hidayat ki.

Tasveer: bashukriya DGPR Balochistan