Balochistan High Court mein awami sahulat markaz ka iftetah, sailin ko muqadmat ki maloomat aik hi maqam par milein gi

Quetta: Adalat-e-aalia Balochistan mein awami sahulat markaz ka iftetah kar diya gaya. Taqreeb mein Chief Justice of Pakistan Justice Yahya Afridi, Supreme Court ke judges Justice Jamal Khan Mandokhail, Justice Naeem Akhtar Afghan aur Justice Muhammad Hashim Khan Kakar, Federal Constitutional Court ke Justice Rozi Khan Barech, Chief Justice Balochistan High Court Justice Muhammad Kamran Khan Mulakhail, High Court ke judges, senior wukala, adalati officers aur deegar muazziz mehmanon ne shirkat ki.

Is moqe par Chief Justice Balochistan High Court Justice Muhammad Kamran Khan Mulakhail ne kaha ke awami sahulat markaz ka maqsad sailin ko bunyadi maloomat aur zaroori sahulyat aik hi maqam par faraham karna aur insaf ke husool ko aam shehri ke liye mazeed aasan banana hai.

Markaz mein dastiyab sahulyat

Markaz mein sailin ke liye intezar gah, washroom, biometric sahulat, maloomati desk aur muqadmat se mutaliq maloomat ke liye computerised machinein nasb ki gayi hain. Sahulat markaz mein sailin apne muqadmat ki tareekh-e-samaat, mutalliqa bench aur deegar dastiyab maloomat hasil kar sakein ge, jabke pehli martaba adalat aane wale shehriyon ko bhi zaroori rehnumai faraham ki jaye gi.

Chief Justice Balochistan High Court ne kaha ke adalati nizam mein bunyadi sahulyat, intezami umoor aur security ko mazeed behtar banane ki zaroorat hai. Adalat ke ahate mein ghair mutaliq afrad ki ghair zaroori amad o raft rokne aur moasir hifazati intezamat yaqeeni banane par bhi tawajjo di ja rahi hai.

Unhon ne awami sahulat markaz ke qiyam mein taawun par Chief Justice Pakistan, Supreme Court ke judges, Balochistan High Court ke judges, wukala, adalati amle, hukumat Balochistan, Communication and Works Department aur deegar mutalliqa hukkam ka shukriya ada kiya. Un ka kehna tha ke awami sahulat markaz ka maqsad adalat aur shehri ke darmiyan fasle ko kam karna aur sailin ko aik munazzam, baawaqar aur awam dost adalati mahaul faraham karna hai.

Tasveer: Bashukriya DGPR Balochistan