Balochistan Civil Services Academy Quetta: 8wein ad hoc nisabi committee ne afsaran ke tarbiyati programon ka nisab manzoor kar liya

Quetta: Balochistan Civil Services Academy (BCSA) Quetta mein 8wein ad hoc nisabi committee ka ijlas Director General BCSA Dr Hafeez Ahmed Jamali ki sadarat mein munaqid hua, jis mein aala sarkari hukkam, mahireen-e-Taleem aur mutaliqa mahkamon ke numainda ne shirkat ki.

Teen tarbiyati programon ka nisab manzoor

Ijlas mein mahkama muwasalat, taamirat, physical planning o housing ke engineers/sub divisional officers ke liye 12 hafton ke pesha warana tarbiyati program, mahkama services and general administration ke superintendents o office coordinators ke liye 8 hafton ke tarbiyati program aur assistant commissioners o section officers ke pehle pre-service tarbiyati program ke nisab par ghaur kiya gaya aur is ki manzoori di gayi.

Ijlas mein committee ke arakeen Dostain Khan Jamaldini, Abdullah Khan, Dr Javed Anwar Shahwani, Dr Faisal Khan, Syed Ghous Ali Shah, Rehmatullah Changezi aur Nazar Muhammad Kakar ne shirkat ki, jabke Muhammad Rafiq Raisani, Muhammad Rafiq aur Dr Ali Nawaz Baloch khusoosi mad’uin ke taur par shareek hue.

Tarbiyati programon ka maqsad sarkari afsaran ki pesha warana, intizami, takneeki aur digital salahiyaton ko jadeed taqazon se hum ahang karna aur moassir, shaffaf aur jawabdeh tarz-e-hukmrani ke liye un ki istedad-e-kaar barhana hai. Balochistan Civil Services Academy sarkari afsaran ki istedad-e-kaar mein izafe, pesha warana miyar ki behtari aur behtareen tarz-e-hukmrani ke farogh ke liye purazm hai.

Tasweer: Bashukriya DG PR Balochistan