Bakhtiyarabad mein Assistant Commissioner Mir Bahadur Khan Bangulzai ki Khuli Kachehri, pani, bijli aur Sehat ke masail pesh

Bakhtiyarabad: Chief Minister Balochistan Mir Sarfraz Bugti aur Chief Secretary Balochistan Shakeel Qadir Khan ke ahkamat aur Deputy Commissioner Sevi Major (r) Ilyas Kabzai ki hidayat ki roshni mein Bakhtiyarabad mein Khuli Kachehri ka inqaad kiya gaya, jis ki qiyadat Assistant Commissioner Bakhtiyarabad Mir Bahadur Khan Bangulzai ne ki. Khuli Kachehri mein SDPO Muhammad Asif Khajak, chairman union council Mir Muhammad Akbar Solangi samet mukhtalif sarkari mahkamon ke afsaran o numainDon ne shirkat ki.

Is moqa par ilaqa makinon ne saaf peene ke pani ki farahmi, bijli ke naye transformers ki tansib, Sehat ki bunyadi sahuliyat ki farahmi aur schoolon mein asatza ki adam hazri samet deegar awami masail aur mushkilat intizamia ke samne pesh keen.

Assistant Commissioner ne shehriyon ki shikayat tafseel se sunin, mutaliqa mahkamon ke afsaran se maloomat hasil keen aur baaz masail ke hal ke liye moqa par hi zaroori ahkamat jari kiye. Unhon ne kaha ke Khuli Kachehri ka maqsad awam ke masail un ki dehleez par sunna aur un ke hal ke liye amli iqdamat yaqeeni banana hai, aur yaqeen dehani karai ke awam ke pesh kardah masail zaroori karrawai ke liye aala hukkam tak pahunchaye jayenge.

Mir Bahadur Khan Bangulzai ne mutaliqa afsaran ko hidayat ki ke Khuli Kachehri mein pesh ki gayi awami shikayat par fori pesh raft yaqeeni banai jaye aur masail ke hal se mutaliq report zilai intizamia ko pesh ki jaye takay awam ko relief ki farahmi mumkin ho sake.

Tasveer: bashukriya DG PR Balochistan