Assistant Commissioner Rakhni Fahad Hussain Umrani ki hotel malikan ko sarkari nirkh nameh par amal-daramad ki hidayat

Rakhni: Assistant Commissioner Rakhni Fahad Hussain Umrani ne ohde ka charge sambhalne ke baad intizami umoor ka aaghaz karte hue shehar mein ashya-e-khurdonosh aur deegar zaroori ashya ke sarkari nirkh namon par amal-daramad yaqeeni banane ke liye iqdamat shuru kar diye hain.

Is silsile mein unhon ne Dera Ghazi Khan aur Rakhni ke hotel malikan se mulaqat ki aur unhein sarkari nirkh nameh ke mutabiq ashya farokht karne ki hidayat ki. Unhon ne wazeh kiya ke nirkh nameh ki khilaf warzi aur shehriyon se zaid qeemtein wasool karne walon ke khilaf qanoon ke mutabiq karrawai ki jaye gi.

Fahad Hussain Umrani ne kaha ke awam ko muqarrara nirkhon par ashya-e-zaroriya ki faraham, aur najaiz munafa khori ki roktham intizamiya ki awwaleen tarjeehat mein shamil hai. Unhon ne ahalkaron ko bazaron mein nirkh namon ki baqaida partal aur nigrani jari rakhne ki hidayat karte hue kaha ke kisi fard ya karobari tabqe ko sarkari ahkamat ki khilaf warzi ki ijazat nahin di jaye gi.

Awami halqon ne in iqdamat ka khair-maqdam karte hue umeed zahir ki hai ke gandum aur aate ke Karobar se wabasta afrad ki bhi mu’assir nigrani hogi aur naap tol mein kami ya muqarrara nirkh se zaid wasooli par qanoon ke mutabiq karrawai ki jaye gi.

Tasveer: Bashukriya DGPR Balochistan