Assistant Commissioner Ormara Mahnoor Barkat ka sarkari schoolon ka daura, taleemi sahuliyat ka jaiza

Ormara: Assistant Commissioner Mahnoor Barkat ne kaha hai ke subai hukumat ki Taleem dost policy ke tahat taleemi idaron mein miyari Taleem, behtar taleemi mahaul aur bunyadi sahuliyat ki faraahmi yaqeeni banane ke liye har mumkin iqdamat kiye ja rahe hain.

Unhon ne yeh baat Government Girls High School Ormara, Government Girls Primary School Ghazi Lane aur Government Boys High School Ghazi Lane ke daure mein asatiza aur talba o talibat se guftagu karte hue kahi. Is moqe par unhon ne talba o asatiza ki hazri, taleemi o bunyadi sahuliyat, jari taraqqiyati kamon, staff ki zaruriyat aur talba ke masail ka jaiza liya.

Assistant Commissioner ne schoolon mein sazgar taleemi mahaul ke farogh, talba ki hazri mein behtari aur dastiyab sahuliyat ke muassir istemal par zor diya. Un ka kehna tha ke talba o talibat ko miyari Taleem aur behtareen taleemi mawaqe ki faraahmi hukumat ki awleen tarjihat mein shamil hai. Unhon ne mutalliqa hukkam ko taleemi idaron ke masail ke hal aur zaruri sahuliyat ki faraahmi ke liye muassir iqdamat ki hidayat ki.

Tasveer: bashukriya DGPR Balochistan