Assistant Commissioner Ormara Dr Mahnoor Barkat ka Coastal Highway ke hotelon par chhapa, khilaf warziyon par jurmane

Ormara: Awami shikayat par Assistant Commissioner Ormara Dr Mahnoor Barkat ne Makuran Coastal Highway ke Zero Point par qayam hotelon aur restaurants par achanak chhapa mara aur khane peene ki ashya ke miyar, safai, hifzan-e-sehat, washrooms aur muqarrara nirkhon ka jaiza liya.

Muaine mein chaar hotelon aur restaurants ki mukammal checking ki gayi aur ghair miyari ashya-e-khurdonosh aur deegar khilaf warziyon par malikan ko jurmane kiye gaye. Assistant Commissioner ne hidayat ki ke shehriyon aur musafiron ko saaf suthra, miyari aur mehfooz khana faraham kiya jaye.

Dr Mahnoor Barkat ne wazeh kiya ke awam ki sehat se khelne ki ijazat nahin di jayegi aur naqis ya zaid ul miyaad ashya, safai mein ghaflat aur nirkhon ki khilaf warzi par mazeed sakht qanooni karrawai hogi. Unhon ne kaha ke achanak muainon ka silsila jari rahega aur khilaf warzi karne walon se koi riayat nahin barti jayegi.

Tasveer: Bashukriya DGPR Balochistan