Assistant Commissioner Jhat Pat Dhiraj Kalra ka DHQ Hospital Dera Allahyar ka daura, emergency adwiyat aur safai ka jaiza

Jafarabad: Deputy Commissioner Jafarabad Khalid Khan ki hidayat par Assistant Commissioner Jhat Pat Dhiraj Kalra ne District Headquarter Hospital Dera Allahyar ka tafseeli daura kiya aur mukhtalif shobon ka moayena karte hue mareezon ko di jane wali tibbi sahuliyat ka jaiza liya.

Hospital intizamia ne Assistant Commissioner ko adwiyat ki dastyabi, emergency medicine stock, safai suthrai, dental OPD, zacha o bacha ki Sehat aur paediatric ward ke bare mein briefing di.

Dhiraj Kalra ne emergency medicine stock ka moayena kar ke adwiyat ki dastyabi aur record baqaidagi se check karne ki hidayat ki taake hangami surat-e-haal mein mareezon ko fori tibbi imdad mil sake. Unhon ne wards mein safai ka jaiza le kar miyar mazeed behtar banane aur khusoosi safai muhim chalane ki hidayat bhi ki.

Dental OPD ke moayene ke dauran unhon ne kaha ke mareezon ko behtar dental sahuliyat ki faraahmi ke liye dastiyab wasail mowasir andaz mein istemal kiye jayen. Assistant Commissioner ne zacha o bacha aur paediatric wards mein zaroori sahuliyat, amle ki hazri aur mareezon ki munasib dekh bhal yaqeeni banane par bhi zor diya.

Tasveer: Bashukriya DGPR Balochistan