Assistant Commissioner Gwadar Romail Naeem Jan ka BHU Shadoband ka daura, Telehealth Center ka bhi muaina

Gwadar: Wazir-e-aala Balochistan Mir Sarfraz Bugti ke vision ke tehat shehriyon ko dehleez par miyari bunyadi tibbi sahuliyat ki faraahmi aur sarkari Sehat markaz ki karkardagi behtar banane ke liye intizamia ki jaanib se Sehat markaz ki nigrani jari hai. Isi silsile mein Assistant Commissioner Gwadar Romail Naeem Jan ne bunyadi markaz-e-Sehat (BHU) Shadoband ka daura kiya aur tibbi sahuliyat, amle ki hazri aur intizami umoor ka tafseeli jaiza liya.

Daure mein Assistant Commissioner ne tibbi o moawin amle ki hazri check ki jo tasalli bakhsh payi gayi, aur mareezon ko khidmaat faraham karne wale ahalkaron se mulaqat ki. Unhon ne vaccination room mein vaccines ki zakhira kari, cold chain aur Hifazati Teeka Jat ki faraahmi ke tareeqa-e-kaar ka jaiza liya.

Unhon ne adviyat ke store mein dastiyab adviyat ki miqdar, miyaad-e-istemal aur mehfooz zakhira kari ke intizamat dekhe, jabke mareezon ki sahuliyat aur fori tibbi nigahdasht ke liye makhsoos kamre ka bhi muaina kiya.

Baad azan unhon ne Telehealth Center ka daura kiya, jahan Shadoband ke mareezon ko COMSATS Islamabad ke doctors ke zariye online tibbi mushawarat di ja rahi hai. Assistant Commissioner ne Telehealth system ke zariye duty par mojood doctor se barah-e-raast raabta kiya aur door daraz ilaqon ke mareezon ko remote mushawarat ki faraahmi ke tareeqa-e-kaar ka jaiza liya.

Assistant Commissioner ne markaz ki mujmui karkardagi par itminan zahir karte hue hidayat ki ke amle ki baqaida hazri, adviyat o vaccines ki munasib zakhira kari aur barvaqt tibbi sahuliyat ki faraahmi har surat yaqeeni banayi jaye. Unhon ne kaha ke door daraz ilaqon mein bunyadi Sehat markaz ko faal banana hukumat Balochistan ki tarjihaat mein shamil hai taake awam ko ilaaj ke liye taweel safar na karna pade.

Tasveer: Bashukriya DG PR Balochistan