Agriculture Department Gwadar ki August report: 135 naye kisan register, 65 se zayed mein Kisan Card taqseem

Gwadar: Hukumat-e-Balochistan ki kisan dost aur paidar zarai policy ke tahet Deputy Director Zaraat (Tausiee) zila Gwadar Maqbool Ahmed Baloch ki nigrani mein Agriculture Department Extension Gwadar ne August 2026 ke dauran mausamiyati tabdeeliyon ke asraat se nimatne, zarai paidawar barhane aur kisanon ko jadeed sahuliyat o rehnumai dene ke liye mutaddid iqdamat kiye.

Mahkame ki majmui hazri 92 feesad rahi. Climate Smart Agriculture (CSA), Farmer Field Schools, Integrated Pest Management (IPM) aur jadeed zarai tareeqon ke farogh ke sath kisanon ko mausam, faslon ki bimariyon aur keedon ke tadaruk se mutaliq barwaqt agahi di gayi. August mein 135 naye kisan register kiye gaye aur 65 se zayed kisanon mein Kisan Cards taqseem kiye gaye.

Report ke mutabiq mahkame ne 120 field visits, 100 Farmer Field Days o agahi sessions, 50 kisan tarbiyati sargarmiyon aur 50 technical o mushawarati khidmat ke ahdaf ke muqable mein bil-tarteeb 9, 5, 3 aur 45 sargarmiyan mukammal kin, jabke Social Media aur deegar digital zarae se 23 se zayed agahi sessions bhi munaqid kiye gaye.

Mausamiyati tabdeeli aur ghair mausmi barishon ke nuqsanat se bachao ke liye kisanon ko SMS aur WhatsApp alerts, raised beds par kasht, mitti ki namkiyat ke tadaruk, mitti ke namune laboratory bhijwane aur gypsum ke munasib istemal se mutaliq rehnumai di gayi. Faslon ko garmi se bachane ke liye temperature controlled storage aur zarai infrastructure ki tajaweez par bhi kaam jari hai.

Deputy Director Zaraat ke mutabiq zile mein miyari beej o khad ki dastiyabi, pani zakhira karne ke talab, pukhta zarai nalyan aur farm to market sarkain aham zarooriyat hain. Mehdood wasail ke bawajood mahkama mausamiyati tabdeeliyon se hum ahang zaraat ke farogh aur kisanon ki khushhali ke liye khidmat jari rakhe hue hai.

Tasveer: Bashukriya DGPR Balochistan