Ziarat: Sarkari mulazimeen ke SAP record mein tareekh-e-paidaish ki durustgi, Deputy Commissioner Abdul Quddus Achakzai ki zer-e-sadarat ijlas

Ziarat: Deputy Commissioner Ziarat Abdul Quddus Achakzai ki zer-e-sadarat SAP (Systems, Applications and Products) record mein sarkari mulazimeen ki tareekh-e-paidaish ki durustgi o tashih ke hawale se ijlas munaqid hua, jis mein Superintendent of Police Ziarat Abdul Malik Durrani, Assistant Commissioner Ziarat Habib ur Rehman Kakar, District Accounts Officer Abdul Naeem Panezai aur Deputy District Education Officer Naqeebullah Kakar samet mutaliqa afsaran ne shirkat ki.

Ijlas mein SAP record mein darj tareekh-e-paidaish ki durustgi, tashih aur is silsile mein mausool darkhwaston o cases ka jaiza liya gaya aur darkhwast formon, moawin dastaweezat aur sarkari record ki jaanch partaal ke tareeqa-e-kaar par ghaur kiya gaya. District Accounts Office ke kirdar aur zimmedariyon par bhi baat hui aur is amr par zor diya gaya ke service record ko durust, mukammal aur shaffaf rakhne ke liye tamam mehkame murabit hikmat-e-amli ke tehat kaam karein.

Deputy Commissioner ne hidayat ki ke tareekh-e-paidaish se mutaliq tamam cases ki mukammal aur ghair jaanibdarana jaanch partaal ki jaye aur dastaweezat ki baqaida tasdeeq ke baad hi qawaid ke mutabiq karrawai ho. Unhon ne kaha ke sarkari record ki durustgi, shaffafiyat aur barwaqt tasdeeq mouassir intizami umoor ka bunyadi taqaza hai, aur mulazimeen ke record ke muamlat mein merit, shaffafiyat aur dastaweezi suboot ko bunyadi ahmiyat di jaye taake sarkari record mein koi ghalti, ibham ya tazad baqi na rahe.

Tasveer: Bashukriya DG PR Balochistan