America ko jughrafiyai wujuhat ki bina par Pakistan se talluqat rakhne hain: Marco Rubio ka Bharat mein bayan

New Delhi: Amriki wazir-e-kharija Marco Rubio ne Bharat ke teen roza daure ke dauran ek Bharati media idare ko interview dete hue Pakistan ke sath Washington ke dahaiyon purane talluqat ka difa kiya aur is ki wajah Pakistan ki jughrafiyai haisiyat qarar di. Yeh is saal un ka Bharat ka doosra sarkari daura hai.

Senator aur ab wazir-e-kharija ki haisiyat se Pakistan ke bare mein apne khayalat se mutalliq sawal par Rubio ne kaha ke Amriki kharija policy chalana un ki zimmedari hai, jis ke liye un mumalik se bhi rawabit rakhne parte hain jin se ikhtilafat hon.

Unhon ne dohraya ke America duniya mein kahin bhi Dehshatgardi aur is ki sarparasti karne walon ke khilaf hai, taham johri hathiyaron ke hamil mulk Pakistan ke sath talluq barqarar rakhna America ki zaroorat hai.

Rubio ne kaha ke jughrafiyai lihaz se America ko Pakistan se rabte mein rehna parta hai, bilkul isi tarah jaise Bharati hukumat Iran se talluqat rakhti hai aur is ke rahnumaon se mulaqatein karti hai.

Geo News ke mutabiq Amriki wazir-e-kharija ne yeh daawa bhi kiya ke abnaon se tel aur tawanai ki tarseel tanaze se pehle ki satah ke 80 se 100 feesad tak pahunch chuki hai.