Tehreek Tahaffuz-e-Aeen ka ijlas, 27 September ka ehtijaj mulk bhar mein phailane ka faisla

Wafaqi daarul hukumat mein Tehreek Tahaffuz-e-Aeen Pakistan ka aham ijlas ittehad ke sarbarah aur qaid-e-hizb-e-ikhtilaf Mahmood Khan Achakzai ki zer-e-sadarat munaqid hua, jis mein mulki siyasi surat-e-haal, Mashriq-e-Wusta ke bohran aur is ke Pakistan par mumkina asraat samet mukhtalif aham umoor par ghaur kiya gaya.

Ijlas mein qaid-e-hizb-e-ikhtilaf Senate Allama Nasir Abbas, chairman PTI Barrister Gohar, Salman Akram Raja, Asad Qaiser, BNP ke sarbarah Sardar Akhtar Jan Mengal, Zain Shah, Mustafa Nawaz Khokhar, Zubair Umar, Senator Mushtaq Ahmad samet deegar rahnumaon ne shirkat ki.

Ailamiye mein kaha gaya ke ijlas mein hukumati maashi policyon ke nateeje mein awam ko darpesh mushkilat, mehngai, berozgari, petroleum masnuaat ki qeemton aur Balochistan o Khyber Pakhtunkhwa mein Aman o Aman ki surat-e-haal par tafseeli tabadla-e-khayal kiya gaya, mujawwaza 28wein aeeni tarmeem aur naye sooboon ke qayam se mutaliq umoor bhi zer-e-ghaur aaye.

Ailamiye mein yeh baat bhi samne aayi ke ijlas ke shurka ne 27 September ke ehtijaj ko moassir banane ke liye mushtarka siyasi, media aur awami rabita hikmat-e-amli tashkeel dene ka faisla kiya hai, jabke tamam jamhoori jamaaton se rabite taiz karne aur All Parties Conference ke inaqad par bhi ittefaq kiya gaya.

Tehreek Tahaffuz-e-Aeen ke ailamiye mein shurka ka kehna tha ke pur-aman ehtijaj awam aur siyasi jamaaton ka aeeni haq hai, jabke 27 September ke ehtijaj ko tehreek ka nukta-e-aghaz qarar dete hue ise mulk ke kone kone tak phailane ka faisla kiya gaya, ehtijaj ke bunyadi agenda mein mehngai, berozgari, petrol ki qeematein aur Aman o Aman ki surat-e-haal shamil hongi.

Ijlas mein aeen, parliament, wafaqi nizam aur subai huqooq ke tahaffuz, NFC Award aur sooboon ke wasail o ikhtiyarat ke tahaffuz par ittefaq kiya gaya aur ghair-numainda hukumat ko sooboon ki jughrafiyai haisiyat tabdeel karne ya unhein mehaz intizami units mein taqseem karne ka ikhtiyar nahin.

Tehreek ne Sindh ki maujooda jughrafiyai o intizami haisiyat barqarar rakhne par zor dete hue Darya-e-Sindh ke nizam mein pani ki shadeed kami par bhi tashweesh ka izhar kiya aur naye canals o aabi mansoobe shuru na karne ka mutalba kiya.

Ailamiye mein bani PTI ke ilaaj se mutaliq Supreme Court ke faisle par amal-dar-amad na hone par tahaffuzat ka izhar karte hue bani PTI, un ki ahliya aur deegar aseeran ki Sehat aur mulaqaton par tashweesh zahir ki gayi aur barah-e-raast mulaqat ka mutalba kiya gaya.

Ijlas mein tamam jabri gumshuda afraad ki fori bazyabi, target killing, mubayyina jaali muqablon, mawraye adalat qatl aur death squads ke khatme ka mutalba bhi kiya gaya, PTI karkunon ke gharon par chhapon, giraftariyon aur chaadar o chaar deewari ke taqaddus ki mubayyina pamali ki muzammat ki gayi.

Tehreek ne BYC rahnumaon samet siyasi karkunon ki rihai aur siyasi muqadmaat ke khatme, border tijarat fori bahal karne aur Mines and Minerals Act mustarad karne ka mutalba kiya, wazir-e-aala Khyber Pakhtunkhwa Sohail Afridi ke daura Punjab ke dauran mubayyina rawaiye ko ghair-jamhoori qarar dete hue muzammat ki gayi jabke Kohat dhamake ki bhi shadeed muzammat ki gayi.

Ailamiye mein 26wein aur 27wein aeeni tarameem par tahaffuzat ka izhar karte hue parliament ke aeeni kirdar ke tahaffuz par zor diya gaya jab ke Imaan Mazari ki rihai ke baad dobara giraftari ki bhi muzammat ki gayi.