Aaeen ke mutabiq wazir-e-aala aur speaker ko qaid nahin kiya ja sakta: Ali Zafar

Islamabad: Pakistan Tehreek-e-Insaf ke rahnuma Barrister Ali Zafar ne kaha hai ke aaeen ke mutabiq aik wazir-e-aala aur speaker ko is tarah qaid mein nahin daala ja sakta, aur na hi unhein utha kar namaloom maqam par pahunchaya ja sakta hai. Un ke baqaul aaeen shikni to ho chuki hai, lekin hukumat mazeed aaeen ki khilaf warzi kar rahi hai.

Parliament House mein guftagu karte hue Barrister Ali Zafar ne kaha ke maujooda halat mein parliamentary party ko kirdar ada karna hai aur use bohat aham faislay fori karne hain. Unhon ne kaha ke parliamentary party ko mazboot karne ki zarurat hai.

Un ka kehna tha ke hamare parliamentarians hi ehtijaj ho ya mazakrat, har maamle mein shamil hote hain, is liye zaroori hai ke woh faislay karein. Is ka yeh matlab nahin ke political committee aur core committee khatam ho gayi hain, yeh dono committees apni jagah achha kaam kar rahi hain.

Unhon ne kaha ke bani PTI aur un ki family samet qaum ko insaf milna chahiye. Naye intizami units se mutaliq un ka wazeh mauqif hai ke soobay us waqt bannay chahiyen jab ittefaq-e-raye ho, kyunke is waqt aur bhi bohat se masail hain.