Spain Football Federation ka Islamophobic naron par FIFA ki saza ke khilaf aalmi salisi adalat se rujoo

Madrid: Spain Football Federation ne Misr ke khilaf dostana match ke dauran Muslim mukhalif naron par aaid pabandiyon ke khilaf FIFA ki appeal mustard hone ke baad khelon ki aalmi salisi adalat (CAS) se rujoo karne ka faisla kiya hai.

Ghair mulki media ke mutabiq FIFA ne Spanish Football Federation par 20 hazar dollar jurmana aaid kiya tha, jabke aainda home friendly match mein stadium ki kam az kam 15 feesad nashistein band rakhne ka hukm bhi diya tha.

March ka waqia

Yeh waqia March mein Barcelona ke qareeb RCDE Stadium mein Spain aur Misr ke darmiyan World Cup tayyariyon ke match mein pesh aaya, jo baghair kisi goal ke barabar raha. Match ke dauran baaz shaiqeen ne Musalmanon ke khilaf nare lagaye, jis par stadium intizamia ne intabah jari kiya.

Muslim footballer Lamine Yamal ne bhi un naron ko naqabil-e-bardasht qarar dete hue mazammat ki thi.

Spanish Federation ka mauqif hai ke us ne fori karrawai ki aur mutaliqa hukkam se mukammal taawun kiya. Federation ne saza ko sakht qarar dete hue kaha ke naron ki rok tham ke liye muassir iqdamat kiye gaye the.

Doosri janib FIFA ki Disciplinary Committee ke mutabiq kisi lafz ka imtiyazi istemal sirf wazeh tauheen amez istilahat tak mehdood nahin balke us ka siyaq o sabaq bhi ahmiyat rakhta hai.

Ab is mamle ka faisla khelon ki aalmi salisi adalat karegi.