Secretary RTA Quetta Naimatullah Tareen ne driving license ke umeedwaron ka amali test liya

Quetta: Secretary Regional Transport Authority Quetta Division Naimatullah Tareen ne driving license ke liye aane wale umeedwaron ka amali driving test liya aur un ki driving salahiyaton aur traffic qawaneen se aagahi ka jaiza liya.

Test mein umeedwaron se gaari chalane, mor kaatne, reverse, parking, gaari par control, ishaaron ke durust istemal, traffic qawaneen ki pabandi aur mehfooz driving samet mukhtalif maharaton ka imtihan liya gaya, aur har umeedwar ko muqarrara miyar ke mutabiq jaancha gaya.

Naimatullah Tareen ne kaha ke driving license sirf un afraad ko jari hona chahiye jo driving ki mukammal maharat rakhte hon aur traffic qawaneen se bakhoobi waqif hon. Unhon ne kaha ke license mahaz ek dastaweez nahin balke aham zimmedari hai, is liye test mein merit aur shaffafiyat har surat yaqeeni banai jaye gi.

Unhon ne kaha ke hadsaat ki roktham aur insani jaanon ke tahaffuz ke liye umeedwaron ki salahiyaton ko amali taur par jaanchna zaroori hai, kyunke ghair zimmedarana driving khud driver aur deegar shehriyon dono ki zindagi ke liye khatra ban sakti hai.

Tasveer: Bashukriya DG PR Balochistan