Sarkari Hajj scheme: doosri qist 5 se 20 October tak jama ho sakegi, medical certificate lazmi

Islamabad (Atemad Desk): Wizarat-e-mazhabi umoor ne sarkari Hajj scheme ke tahat doosri qist ki wusooli ka aghaz kar diya hai. Tarjuman wizarat ke mutabiq sarkari azmeen-e-Hajj 5 se 20 October tak doosri qist jama kara sakein ge.

Doosri qist jama karane se pehle azmeen ke liye medical fitness certificate upload karna lazmi qarar diya gaya hai.

Tarjuman ne wazeh kiya ke muqarrara tareekh tak doosri qist jama na karane wale azmeen ki Hajj darkhwast mansookh tasawwur hogi, aur darkhwast mansookh hone ki soorat mein pehle se jama shuda wajibat mutalliqa account mein wapas kar diye jayenge.