Salamati Council Dehshatgardi ke khilaf mojooda nizam se khamiyan door kare: Pakistan

Aqwam-e-Muttahida mein Pakistan ke mustaqil mandoob safeer Asim Iftikhar Ahmad ne ‘Dehshatgardi ki karrawaiyon se International aman aur security ko lahaq khatraat, nine eleven ke 25 saal baad. Dehshatgardi ke khilaf Salamati Council ki larai ki tajdeed’ ke mauzu par Salamati Council mein khitab karte hue saat Pakistaniyon samet nine eleven ke dehshatgard hamlon ka nishana banne walon ko khiraj-e-tehseen pesh kiya aur Amriki hukumat aur awam ke sath yakjehti ka izhar kiya.

Nine eleven par aalmi radd-e-amal ka zikr karte hue safeer Asim Iftikhar Ahmad ne kaha ke in hamlon ke nateeje mein Salamati Council ne fori karrawai ki, jis mein qarardad 1373 ki manzoori bhi shamil hai, jo tahal Aqwam-e-Muttahida ke insidad-e-Dehshatgardi framework ka ek aham juzu hai.

Unhon ne Dehshatgardi ke khilaf aalmi jang mein Pakistan ke front line kirdar ko ujagar karte hue kaha ke Pakistan ki insidad-e-Dehshatgardi ki koshishon, intelligence taawun aur International sharakat daron ke sath security hum ahangi ne Al Qaeda ki salahiyaton ko namayan had tak kam kiya hai.

Unhon ne kaha ke Al Qaeda ke khilaf International muhim mein sab se namayan kamyabiyan Pakistan ki insidad-e-Dehshatgardi ki koshishon aur faal taawun ke zariye hasil ki gayin.

Pakistan ke mustaqil mandoob Asim Iftikhar Ahmad ne zor diya ke Pakistan ne is jang mein bahut bhari qeemat chukai hai, rawan sadi ke aghaz se ab tak security aur qanoon nafiz karne wale ahalkaron aur aam shehriyon samet 90 hazar se zaid Pakistani Dehshatgardi ka nishana ban kar apni janon se hath dho baithe hain, jab ke is ke sath sath musalsal maashi nuqsanat bhi uthane pare hain.

Unhon ne kaha ke Salamati Council ne 25 saal qabl hangami buniyadon, ittehad aur azm ke sath radd-e-amal diya tha, lekin is ke baad se Dehshatgardi ke khatre ki nauiyat badal chuki hai, Dehshatgardi ka manzarnama ab tabdeel ho kar nayi shakl ikhtiyar kar chuka hai aur naye khatraat ubhar kar samne aaye hain.

Un ka kehna tha ke International insidad-e-Dehshatgardi ke framework mein khamiyon ko door karne ke liye pabandiyon ke mojooda nizam ko mazboot banane ki zarurat hai.

Unhon ne intehai dayen bazu ki shiddat pasandi ke urooj, Africa, Middle East aur Afghanistan mein Dehshatgardi ke musalsal khatre ke sath sath dehshatgardon ke propaganda, zehn sazi, bharti, rawabit aur maali aanat ke liye jadeed Technology ke istemal ko bhi ujagar kiya.

Afghanistan se panapne wali Dehshatgardi par khas tashweesh ka izhar karte hue unhon ne kaha ke teen barson ke douran 4700 se zaid Pakistani Dehshatgardi ki bhent charh chuke hain.

Unhon ne TTP, BLA, ETIM aur Daesh samet dehshatgard giroohon ke khilaf mouassar International karrawai ka bhi mutalba kiya.

Asim Iftikhar ne dehshatgardon ki maali aanat ke liye dark web, virtual asasson aur crypto currencies ke barhte hue istemal se bhi khabardar karte hue kaha ke qawaid o zawabit ki adam mojoodgi mein, yeh khatra yaqeeni taur par kayi guna barh jayega.

Unhon ne insidad-e-Dehshatgardi ke liye jame nuqta nazar par zor diya, jis mein Aqwam-e-Muttahida ki aalmi insidad-e-Dehshatgardi ki hikmat amli ke charon sutoonon par mutawazin amal darmad aur Dehshatgardi ke bunyadi asbab aur is ke liye sazgar halat se nimatne par ziyada tawajjo dena shamil hai.

Un ka kehna tha ke ghair mulki qabze ki surat-e-haal mein bhi ehtesab ka itlaq hona chahiye, aur kaha ke qabiz quwwaton ko jawabdeh thehraya jana chahiye aur unhein apna haq-e-khudaraadiyat istemal karne wale awam ke khilaf istisna ke sath karrawai karne ki ijazat nahin di jani chahiye.

Asim Iftikhar ne kaha ke International radd-e-amal ko Dehshatgardi ke tezi se badalte hue khatre se aage rehna chahiye, Dehshatgardi ke khilaf International radd-e-amal ko tez tar hona chahiye, balke tezi se ubharte hue khatre se aage hona chahiye.

Unhon ne Salamati Council par zor diya ke woh apni zimmedari uthaye, is baat ko yaqeeni banaye ke mujrimon ko insaf ke katehre mein laya jaye, aur is aalmi khatre ke khilaf aik muttahid aur ijtimai mahaz banane ke liye International taawun aur ilaqai hum ahangi ko mazboot kare.