PTI mein andruni ikhtilafat shadeed, core committee ijlas mein long march ki nakami ka zimmedar Sohail Afridi qarar

Islamabad: Pakistan Tehreek-e-Insaf mein andruni ikhtilafat shiddat ikhtiyar kar gaye hain aur core committee ke haliya ijlas mein rahnuma ek doosre par shadeed tanqeed karte nazar aaye.

Report ke mutabiq PTI ki markazi qayadat mein shadeed andruni ikhtilafat khul kar samne aa gaye hain. Islamabad long march ki nakami aur Khyber Pakhtunkhwa hukumat ke khatme ke baad party mushkil waqt mein muttahid hone ke bajaye mukhtalif dhadon aur andruni tanqeed ki lapet mein aa gayi hai.

Sohail Afridi par tanqeed

Zarae ne bataya ke ijlas ke dauran long march se qabl 20 lakh afrad ko Islamabad lane aur mutalibat manwane ke daawe karne wale Sohail Afridi ko long march ki nakami ka tamam tar zimmedar qarar diya gaya.

Rahnumaon ka kehna tha ke Sohail Afridi ke paas march ke liye koi wazeh hikmat-e-amali nahin thi aur woh hero se zero ban chuke hain.

Achakzai aur siyasi committee par tahaffuzat

Ijlas mein opposition leader Mahmood Khan Achakzai ke kirdar par bhi shadeed tahaffuzat ka izhar kiya gaya aur un par tanqeed ke teer barsaye gaye.

Salman Akram Raja ki janib se banayi gayi siyasi committee ke qiyam aur is ke tareeqa-e-kaar par bhi party rahnumaon ne khul kar tahaffuzat zahir kiye.

Party zarae ke mutabiq sooba-i hukumat ke jane aur long march ke be-natija khatam hone ke baad PTI ki safon mein shadeed mayoosi hai aur andruni chapqulish uruj par pahunch gayi hai.