Pehla All Khuzdar Under-12 Futsal Tournament: Farhan Academy ne penalty kicks par Mohsin Hasan Academy ko hara diya

Khuzdar: Mehkama Sports aur DFA Khuzdar ke zere-ehtemam pehla All Khuzdar Under-12 Futsal Tournament ikhtitam-pazir ho gaya. Ikhtitami taqreeb Chamrok Futsal Ground mein munaqid hui, jis ki mehman-e-khusoosi District Sports Officer Khuzdar Ruqaiya Obaid thin.

Tournament ke final mein Farhan Academy ne Mohsin Hasan Academy ko penalty kicks par shikast de kar champion trophy apne naam ki. Muqarrara waqt tak donon teamon ne shandar khel pesh karte hue ek ek (1-1) goal kiya, jis ke baad match ka faisla penalty kicks par hua.

Ikhtitami taqreeb mein District Sports Officer Khuzdar Ruqaiya Obaid aur DFA Khuzdar ke sadr Nasrullah Zehri samet digar mueziz ne shirkat ki aur nanhe khilariyon ki hausla afzai ki. Mehman-e-khusoosi ne fateh team Farhan Academy ko champion trophy aur Mohsin Hasan Academy ko runner-up trophy di, jabke behtareen karkardagi dikhane wale khilariyon mein shields aur inamat bhi taqseem kiye.

DFA Khuzdar ke secretary Nasrullah Zehri ne kaha ke yeh tournament Khuzdar mein grass roots level par futsal ke farogh aur naujawan talent ko samne lane ki jaanib ek aham aur qabil-e-tehseen qadam hai.

Tasveer: Bashukriya DGPR Balochistan