Pakistan mein hone wali dehshatgardi mein Afghan sarzameen istemal ho rahi hai, Talal Chaudhry

Wazir-e-mamlikat bara-e-dakhila Talal Chaudhry ka kehna hai ke Pakistan mein hone wali dehshatgardi mein Afghan sarzameen istemal ho rahi hai.

Wazir-e-mamlikat bara-e-dakhila Senator Talal Chaudhry ne kaha hai ke Pakistan mein dehshatgardi ke sath ek munazzam ‘terror crime network’ bhi sargarm hai, jo smuggling, manshiyat, ghair qanooni petroleum masnoaat aur aslahe ki faraahmi samet mukhtalif ghair qanooni sargarmiyon ke zariye dehshat gard karrawaiyon ko sahoolat faraham karta hai.

Press conference karte hue Talal Chaudhry ne kaha ke bohat se log in sargarmiyon ko apna karobar qarar dete hain, taham hukumat unhein ‘terror crime’ samajhti hai. Is network mein gariyon ki smuggling, manshiyat ka karobar, ghair qanooni petroleum masnoaat aur aslahe ki faraahmi shamil hai, jo aam jaraim pesha anasir se le kar bare networks tak pahunchai jati hain.

Wazir-e-mamlikat ne Azad Jammu o Kashmir mein ek jamaat ko kalaadam qarar diye jane ka hawala dete hue kaha ke us waqt bhi bohat se sawalat uthaye gaye the ke yeh Kashmiriyon ke huqooq ki siyasi jamaat ya koi committee hai aur ise siyasi bunyadon par kalaadam qarar diya gaya hai.

Talal Chaudhry ne kaha ke us waqt bhi wazeh kiya gaya tha ke jamaat ko intehai zimmedari ke sath dastiyab shawahid ki bunyad par kalaadam qarar diya gaya, jin ki tehqiqat jari hain aur is hawale se bohat si cheezein samne aa chuki hain.

Unhon ne kaha ke Social Media par samne aane wali baaz audios bhi logon ne sunin, taham un ke hawale se yeh sawal uthaya gaya ke aaya woh Artificial Intelligence se tayyar ki gayi hain ya in mein rad-o-badal kiya gaya hai. Wazir-e-mamlikat ne kaha ke in muamlat ki haqeeqat jaanne ke liye shawahid aur tehqiqat ko samne rakhna zaroori hai.

Unhon ne mazeed kaha ke hukumat ke pas dehshatgardi aur is ki moawanat karne wale networks ke khilaf karrawai ke liye shawahid mojood hain aur in muamlat ko siyasi rang dene ke bajaye haqaiq aur tehqiqat ki roshni mein dekha jana chahiye.

Wazir-e-mamlikat bara-e-dakhila Senator Talal Chaudhry ne daawa kiya hai ke Azad Jammu o Kashmir mein ek shakhs guzishta kai baras se mukhtalif afrad ko aslaha faraham karne ke kaam mein mulawwis hai, jabke guzishta do baras se woh ek makhsoos giroh ke logon ko barah-e-raast aslaha faraham kar raha hai.

Press conference ke dauran Talal Chaudhry ne bataya ke is muamle ka aghaz Zia nami shakhs se hua, jo Azad Jammu o Kashmir ka rehaishi hai.

Unhon ne kaha ke Zia guzishta 8 se 10 baras se mukhtalif logon ko aslaha faraham karne ka kaam kar raha hai, jabke guzishta do baras ke dauran is ki janib se aslahe ki faraahmi barah-e-raast mazkoora giroh ke afrad ko ki ja rahi hai.

Wazir-e-mamlikat ne kaha ke is muamle se mutaliq tehqiqat ke dauran samne aane wale shawahid ki bunyad par mazeed karrawai ki ja rahi hai.