Musakhel: Ghair hazir asatiza ko show cause notice, tankhwahon mein katauti aur bartarfi ka faisla

Musakhel: Deputy Commissioner Musakhel Abdul Razzaq Khajak ki zer-e-sadarat District Education Committee ka ijlas munaqid hua, jis mein Assistant Commissioner Musakhel Najibullah Kakar, District Education Officer Hafiz Jamaluddin Bazdar aur deegar committee members ne shirkat ki.

Ijlas mein guzishta faislon par amal-darmad ka tafseeli jaiza liya gaya aur taleemi miyar behtar banane ke liye kai aham iqdamat ki manzoori di gayi.

Ghair hazir asatiza ke khilaf sakht karrawai

Ijlas mein duty mein ghaflat bartne aur dauran-e-visit ghair hazir paye jane wale asatiza ke khilaf sakht karrawai ka faisla kiya gaya. Deputy Commissioner / Chairman District Education Committee ne hidayat ki ke aise asatiza ko fori taur par show cause notices jari kiye jayen aur un ki tankhwahen minha ki jayen. Jo asatiza arsa daraz se baghair itla ghair hazir paye gaye, un ki mulazmat se bartarfi ka amal yaqeeni banane ka faisla bhi kiya gaya.

Deputy Commissioner Abdul Razzaq Khajak ne do took alfaz mein kaha ke hukumat-e-Balochistan ki Taleem dost policy ke tahat taleemi idaron mein hazri aur miyar par koi samjhauta nahin kiya jayega. Unhon ne mutalliqa hukkam ko hidayat ki ke sarkari schools mein taleemi mahaul behtar banane aur asatiza ki hazri yaqeeni banane ke liye monitoring ka amal mazeed sakht kiya jaye.

Tasveer: Bashukriya DG PR Balochistan