Mein bani PTI ka hospital mein tibbi muaina, Sehat mand qarar, Adiala jail wapas muntaqil kar diya gaya, Attaullah Tarar

Wafaqi wazir-e-itlaat o nashriyat Attaullah Tarar ne kaha hai ke Supreme Court ke faisle ki roshni mein bani PTI ka hospital mein tibbi muaina karaya gaya, tibbi muaine ke mutabiq bani PTI Sehat mand paye gaye, tamam amal mukammal hone ke baad unhein wapas Adiala jail muntaqil kar diya gaya. Jumma ko samaji rabte ke platform “X” par apni post mein wafaqi wazir-e-itlaat ne kaha ke Supreme Court ke faisle ki roshni mein qaidi ko 20 aur 21 August 2026 ki darmiyani shab munasib hifazati intizamat ke tehat hospital le jaya gaya, mahir-e-amraz-e-chashm, mahir-e-amraz-e-qalb aur physician samet mustanad doctoron ki team ne un ka tafseeli muaina kiya aur unhein tibbi taur par Sehat mand qarar diya. Un ki hamshira Uzma Khan tibbi muaine aur ilaj ke tamam marahil ke dauran mojood rahin. Yeh tamam amal mukammal hone ke baad unhein 21 August 2026 ki subah taqriban 5 baje Adiala jail wapas muntaqil kar diya gaya. Wafaqi wazir-e-itlaat ne mazeed tafsilat se agah karte hue bataya ke tibbi muaina PIMS hospital mein karaya gaya jis mein Shifa International hospital ke doctors bhi mojood the. PTI ke karkunon ki taraf se security ki jo surat-e-haal Shifa International hospital ke raste mein aur bahar paida ki gayi, us ke pesh-e-nazar un ko PIMS hospital le jaya gaya aur tibbi muaine ke mutabiq woh Sehat mand paye gaye. Un ko pehle bhi tibbi sahuliyat faraham ki jati rahi hain aur ab bhi jab un ko zaroorat paray gi tibbi sahuliyat faraham ki jayengi